खेती मा तकनीक के उपयोग: किसान मन ह करत हें ड्रोन ले खरपतवार नाशक के छिड़काव

40 हेक्टेयर मने 100 एकड़ म करिन छिड़काव, बचाइन समय अउ मेहनत

बलौदा बाज़ार भाटापारा, जिला के किसान अब खेती मा तकनीक के उपयोग करके आधुनिक खेती कोती आगू बढ़त हें। इही कड़ी मा विकासखंड भाटापारा के ग्राम पाटन, धौरभठा अउ खोलवा के किसान मन ह खेती मा तकनीक के नवा उदाहरण पेस करे हें। इहाँ लगभग 40 हेक्टेयर रकबा मा किसान मन ह ड्रोन के माध्यम ले खरपतवार नाशक के छिड़काव करवाइन।
जूना जुग के तरीका ले ए रकबा मा छिड़काव करे मा 10 ले 15 दिन लाग जात रहिस। ड्रोन के मदद ले पूरा काम कुछ घंटा मा पूरा होगे। एकर ले किसान मन के समय, मेहनत अउ खरचा तीनों के बचत होइस। ग्राम धौरभठा के किसान आलोक जायसवाल अउ खोलवा के किसान गुड्डू चांडक मन बताइन के पहिली 2 ले 3 एकड़ मा छिड़काव करे बर 2 मजदूर पूरा दिन लगत रहिस। ड्रोन ले 40 हेक्टेयर के काम एक दिन मा होगे। पानी घलो कम लगिस अउ पीठ मा टंकी ढोए के परेशानी नइ रहिस।
कृषि विभाग अउ स्थानीय कृषि तकनीक सेवा देवइया के सहयोग ले ड्रोन ला खेत मा उतारे गीस। ड्रोन ह तय ऊंचाई ले एक बराबर रूप ले खरपतवार नाशक के छिड़काव करिस। एकर से दवा के नुकसान घलो कम होइस अउ फसल मा असर घलो बने रहिस। हाथ ले छिड़काव के तुलना मा 80 प्रतिशत समय कम लागिस। एकर संग मजूरी अउ दवा दुनों मा बचत होइस अउ एक बराबर छिड़काव ले खरपतवार ऊपर बने काबू होइस।
जिला प्रशासन डहर ले सहकारी समिति के माध्यम ले किसान मन ला ड्रोन उपलब्ध कराए जात हे जेमा 4 नग इफको कंपनी के घलो हे। कृषि विभाग के अधिकारी मन बताइन के ए व्यवस्था ले अब छोटे किसान मन ला घलो कम दर मा ड्रोन सेवा मिलत हे। भाटापारा क्षेत्र मा धान अउ दलहन के फसल मा खरपतवार नियंत्रण बर ए तकनीक तेजी ले लोकप्रिय होवत हे। हाल-फिलहाल पाटन, धौरभठा अउ खोलवा के किसान ए प्रयोग ले बहुते संतोस मा हें अउ अवइया सीजन मा अउ जादा रकबा मा ड्रोन ले छिड़काव करवाए के योजना बनावत हें।