- सूखा प्रभावित किसान मन ल घलोक सरकार देही प्रति एकड़ 9000 रूपिया के मदद
- पंडवानी कलाकार स्व. श्री पुनाराम निषाद अऊ स्व. श्री मदन कुमार निषाद के जीवनी के प्रकाशन के घोषणा
रायपुर, 30 अगस्त 2021। मुख्यमंत्री श्री भूपेश बघेल ह कहिन के अभी राज्य के कई क्षेत्र मन म अल्पवृष्टि अऊ अनावृष्टि के चलत सूखा के स्थिति उत्पन्न हो गए हे। छत्तीसगढ़ सरकार विपदा के हर घड़ी म किसान मन के संग खड़े हे। जेन किसान भाई मन ह अभी खरीफ सीजन म धान, कोदो-कुटकी, अरहर के बोवई करे हें, कहूं वर्षा के अभाव म उंखर फसल खराब हो जात हे। चाहे उत्पादन होवय या झन होवय, ओ मन ल सरकार प्रति एकड़ 9000 रूपिया के सहायता देही। उमन कहिन के राजीव गांधी किसान न्याय योजना के तहत सूखा प्रभावित किसान मन ल घलोक गिरदावरी सर्वे के आधार म प्रति एकड़ 9000 रूपिया के मान ले मदद देहे जाही।
मुख्यमंत्री श्री भूपेश बघेल ह पंडवानी कलाकार स्व. पुनाराम निषाद अऊ नाचा-गम्मत कलाकर स्व. मदन निषाद के जीवनी ल प्रकाशित करे के घोषणा अऊ ये संबंध म पाठ्य पुस्तक निगम के अध्यक्ष ल जरूरी कार्यवाही करे के निर्देश तको दीन। मुख्यमंत्री ह कहिन के ये जरूरी हे, ताकि अवइया पीढ़ी ल पुरखा मन के योगदान के जानकारी प्राप्त हो सकय। मुख्यमंत्री ह कहिन के सरकार समाज के सबो वर्ग के भावना, परंपरा, तीज-तिहार अऊ मान्यता मन के सम्मान अऊ छत्तीसगढ़िया स्वाभिमान ल आगू बढ़ावत हे। उमन कहिन के अब भूमिहीन कृषि मजदूर परिवार मन ल हर साल 6000 रूपिया के मदद देहे बर छत्तीसगढ़ सरकार ह राजीव गांधी ग्रामीण भूमिहीन कृषि मजदूर न्याय योजना शुरू करे हे। ये योजना के लाभ लेहे बर पात्र मनखे मन ल 1 सितंबर ले पंजीयन कराए के घलोक आह्वान करे गए हे। मुख्यमंत्री ह कहिन के छत्तीसगढ़ सरकार ह बिलासपुर एयरपोर्ट के नामकरण मछुआ समाज के आराध्य श्रीमती बिलासा देवी के नाम म करे हे। मत्स्य पालन ल कृषि के दर्जा देहे गए हे। उमन कहिन के एखर से मत्स्य कृषक अऊ मछुआरा मन ल किसान मन के जइसेशून्य प्रतिशत ब्याज म ऋण के सुविधा मिले लगे हे। किसान मन के समान रियायती दर म मत्स्य कृषक मन ल बिजली अऊ मछली पालन बर तालाब अऊ जलाशय मन ल निशुल्क पानी मिलही।
संसदीय सचिव श्री कुंवर सिंह निषाद, छत्तीसगढ़ मछुआ कल्याण बोर्ड के अध्यक्ष श्री एम.आर. निषाद ह मछली पालन ल कृषि के दर्जा देहे अऊ बिलासपुर एयरपोर्ट के नाम बिलासा देवी के नाम म करे बर मुख्यमंत्री श्री भूपेश बघेल के समाज कोति ले आभार जताइन।