- धमतरी के जबर्रा म 24 नवंबर ल साइकिलिंग एक्सपीडिशन
- गंगरेल बांध ले जबर्रा तक 55 किलोमीटर के सफर साईकल ले
रायपुर, प्रदेश म कुपोषण ल मिटाय बर मुख्यमंत्री श्री भूपेश बघेल के सियानी म राज्य सरकार कोति ले सुपोषण अभियान चालू करे गए हे। मनखे मन ल कुपोषण के बर जागरूक करे जिला मन म कई नवाचारी काम करे जात हे। इही कड़ी म धमतरी जिला म अवइया 24 नवम्बर ले जबर्रा साइकिलिंग एक्सपीडिशन: दु पाईडिल सुपोषण बर के आयोजन करे जात हे।
धमतरी कलेक्टर श्री रजत बंसल के मार्गदर्शन म जिला प्रशासन अऊ धमतरी पर्यटन कोति ले सुपोषण बर मनखे मन म चेतना लाय बर ये आयोजन करे जात हे। ये आयोजन के नाम ’दु पाईडिल सुपोषण बर’ रखे गए हे। जबर्रा साइकिलिंग एक्सपीडिशन म तीन श्रेणी गंगरेल बांध-कुकरेल (10 किलोमीटर), गंगरेल बांध-कुकरेल-केरेगांव (30 किलोमीटर), गंगरेल बांध-कुकरेल-केरेगांव-दुगली-जबर्रा (55 किलोमीटर) म भाग लेवइया साईकल ले सफर तय कर सकत हें। ये बेरा म गंगरेल बांध ले अभियान के आगाज भिनसरहा 06 बजे शुरू होके 10 किलोमीटर दूरिहा कुकरेल तक साईकल ले तय करे जाही। कुकरेल पहुँचके भाग लेवइया उहां आयोजित मड़ई ले घलोक रु-ब-रु होहीं। ये मड़ई के संग भाग लेवईया मन ल छत्तीसगढ़ी लोक कला, लोक नृत्य जइसे-राउत नाचा, सुआ, कर्मा, ददरिया, गेड़ी नृत्य, खेल विधा जइसन भौरा ,बाटी, पिट्ठूल, खो-खो, कबड्डी, फुगड़ी, छत्तीसगढ़ी व्यंजन, उत्पाद के प्रदर्शनी के लुत्फ उठाए के संगेच छत्तीसगढ़ी संस्कृति ल करीब ले देखे के मौका मिलही। ये साईकल अभियान के तीसर अऊ आखरी मुकाम नगरी के वनांचल म बसे जबर्रा हे। स्वास्थ्य पर्यटन के संभावना मन के सेती इको टूरिज्म के रूप म घोषित जबर्रा म अभियान खतम होही।
अभियान म सामिल होए के इच्छुक 22 नवंबर तक अपन पंजीयन करा सकत हें। एखर बर कई ठन सहयोगी संस्था मन तीर फॉर्म उपलब्ध कराया गए हे। ऑनलाइन पंजीयन बर फॉर्म जिला के वेबसाइट म घलोक उपलब्ध हे। ये अभियान म हिस्सा लेके सुपोषण अभियान ल ना सिरिफ एक नवा आयाम देहे के कोसिस हे, बल्कि साईकल ले जंगल के बीच ले होके गुजरत छत्तीसगढ़ी लोक कला, संस्कृति, खेल विधा ले घलोक वाकिफ होए के बेहतरीन मौका हे। ये अभियान के संबंध म जादा जानकारी बर श्री शैलेन्द्र गुप्ता ले ऊंखर मोबाइल नंबर 78285-06874, अऊ श्री हेमसिंग ठाकुर के मोबाइल नंबर 62671-45745 म सम्पर्क करे जा सकत हे। कलेक्टर श्री रजत बंसल ह जादा ले जादा इच्छुक ल अभियान के हिस्सा बने के अपील करे हें।