कम लागत म जादा फायदा पशु मन ल मिलही अकतहा पोषण
मवेसी मन बर अड़बड़ गुनकारी अउ फसल मन के तको काम के जिनिस अजोला के आजकाल छत्तीसगढ़ के गोठान मन म अड़बड़ गोठ-बात होवत हे। एकर बारे म दुरूग जिला के साहेब मन बताथें के ये ह अड़बड़ जल्दी फइलथे। उंकर बताती 10 ले 15 दिनेच म एखर 10 किलोग्राम फसल तियार हो जाथे। अजोला म नेपियर घास के तुलना म 4 ले 5 गुना जादा प्रोटीन होथे।
का हे अजोला? काबर कहिथें एला पशु मन के च्यवनप्राश-
डॉ. चावला ह बताइस कि अजोला एक अति पोषक छोटकन जलीय फर्न (पौधा) हे, जऊन स्थिर पानी म ऊपर ऊलाए रहिथे। एजोला ल घर म हौदी बनाके, तालाब, झील, गड्ढा, अऊ धान के खेत मन म कहूंच उगाए जा सकत हे। किसान एला टब अऊ ड्रम मन म घलोक उगा सकत हें। ये पौधा पानी म विकसित होके मोटा हरियर चटई के जइसन दिखे लागथे। ये मा प्रोटीन, एमिनो एसिड, विटामिन अउ खनिज लवण के मात्रा जादा होथे। जरूरी अमीनो एसिड, विटामिन (विटामिन ए, विटामिन बी-12 अऊ बीटा-कैरोटीन) संगेच येमा कैल्शियम, फॉस्फोरस, पोटेशियम, आयरन, कॉपर, मैग्नेशियम जइसे खनिज लवण मन तको भरपूर होथे। अजोला भरपूर पूरक पोषण आहार हे जऊन मवेशी मन ल अच्छा पोषण देहे के संगे-संग उंखर रोग प्रतिरोधक क्षमता ल घलोक बढ़ाथे। एखर पोषक गुण मन के सेती एला पशु मन के च्यवनप्राश घलोक कहे जाथे। हरियर चारा साल भर उपलब्ध नइ रहय अऊ कई पशुपालक महंगा पशुआहार खवाए म घलोक समर्थ नइ होवयं। केवल सूखा चारा खाए ले पशु मन ल पूरा पोषण नइ मिलय अऊ कुपोषण के शिकार हो जाथें अऊ ऊंखर दूध देहे के क्षमता घलोक घट जाथे। दुधारू पशु मन ल रोजेच दू किलो तक पौष्टिक आहार के जरूरत होथे, कहूं पशुपालक सूखा चारा जइसे धान के पैरा, गेहूं के भूसा, आदि के संग पशु मन ल अजोला खवावयं त उंखर पोषण के जरूरत पूरा करे जा सकत हे। कहूं पशुपालक चाहयं त पशु मन ल सालभर हरियर आहार अजोला खवा के स्वस्थ रखे के संगेच 20 ले 25 प्रतिशत जादा दूध घलोक ले सकत हें। अजोला ल उगाए म जादा राशि घलोक खरच नइ करना परय। अजोला के खेती करके किसान भाई अपन मवेशी मन बर पौष्टिक चारा के संगे-संग अकतहा आय घलोक अर्जित कर सकत हें।
आसानी ले पचइया आहार हे अजोला-
अजोला पशु मन बर हाई प्रोटीन अऊ लो लिग्निन वाला आहार हे। जऊन ल पशु आसानी ले पचा सकत हे। एखर से पशु मन के प्रजनन क्षमता घलोक बाढ़थे। एला पशु मन के आहार म सामिल करे ले पशु मन के रोग प्रतिरोधक क्षमता बाढ़थे। पशु कम बीमार परथें जेखर से पशुपालक मन उपर आर्थिक भार घलोक कम होथे।
एक बेहतरीन जैविक खाद घलोक हे अजोला-
अजोला कम कीमत म उपलब्ध एक बेहतरीन जैविक खाद हे। एजोला के पांखी मन म एनाबिना नाम के नील हरित शैवाल पाए जाथे जऊन सुरुज के प्रकाश म वायुमण्डलीय नाइट्रोजन के यौगिकीकरण करथे अऊ हरियर खाद के जइसे फसल ल नाइट्रोजन के पूर्ति करथे। अजोला म नाइट्रोजन के मात्रा 3 ले 4 प्रतिशत होथे, संगेच ये मा कई प्रकार के कार्बनिक पदार्थ होथे जऊन जमीन के ऊर्वरा शक्ति बढ़ाथे। एजोला ल खाद के रूप म उपयोग करे ले धान के फसल म 5 ले 15 प्रतिशत तक उत्पादन बढ़ाए जा सकत हे। अजोला हानिकारिक रासायनिक उर्वरक मन के एक बेहतरीन विकल्प हे। जऊन मिट्टी के उर्वरक क्षमता बढ़ाय म मददगार हे। ये खाद के इस्तमाल ले जादा गुणवत्ता के खाद्य पदार्थ मन के पैदावार लेहे जा सकत हे जेखर से सेहत ल कोनो नुकसान नइ पहुंचय।
