जिला म 2152 किसान मन ल मिलीस 9 करोड़ रूपिया ले जादा के ऋण
नारायणपुर, 6 जुलाई 2020। प्रदेश म कृषि क्षेत्र के बहुआयामी विकास अऊ किसान मन के कल्याण के दिशा म राज्य सरकार कोति ले करे जात अथक प्रयास मन के बदौलत छत्तीसगढ़ के किसान मन नवा जिन्दगी अउ आराम पाए लगे हें। सरकार कोति ले उपलब्ध कराए गए ऋण ले ओ मन ल अपन खेती-बाड़ी म तरक्की के संगेच कोठार मन के बढ़ोतरी के घलव आस जागे हे। फसल ऋण के बदौलत जनजाति बहुल क्षेत्र मन म उछाह बगरे हे। खासकर जनजाति बहुल नारायणपुर जिला के किसान मन, सरकारी संरक्षण अऊ मदद के मामला म अपन आप ल खुशकिस्मत मानत हें। किसान मन के मानना हे के राज्य सरकार किसान मन के संग खड़े हे अऊ अब किसान मन बर सोनहा बिहान ह नवा अंजोर लेके आए हे।
नारायणपुर जिला म किसान मन ल फसल ऋण वितरण के मामला म विभाग ह बेहतर उपलब्धि हासिल करे हे। जिला म खरीफ फसल -2020 म ऑनलाइन फसल ऋण वितरण म सहकारी केन्द्रीय बैंक अउ आन बैंक ह पहल करत ये मौसम चक्र म 2152 किसान मन ल 9 करोड़ 2 लाख 66 हजार रूपिया के अल्प कालीन फसल ऋण के वितरण करके रिकार्ड कायम करे हे। ये मा सहकारी केन्द्रीय बैंक ले 2095 किसान मन ल 6 करोड़ 62 लाख 52 हजार रूपिया नकद अऊ 2 करोड़ 4 लाख 99 हजार रूपिया के खाद-बीज अउ आन सामान देहे गए हे। अइसनहे आन बैंक मन ले 157 किसान मन ल 35 लाख 15 हज़ार रुपए नक़द अऊ चीज के रूप म देहे गए हे। खरीफ फसल बर ये ऋण 1 अपरेल 2020 ले 30 जून 2020 म देहे गए हे। चालू साल म नवा किसान मन ल घलोक ऋण देहे गए हे।
मुख्यमंत्री श्री भूपेश बघेल के आभार जतावत हें धरती पुत्र
किसान मन के मानना हे के मुख्यमंत्री श्री भूपेश बघेल के सरकार ह जऊन पारदर्शिता अऊ संवेदनशीलता के संग किसान मन के हित मन बर जऊन ऐतिहासिक निर्णय लेके ओकर सार्थक क्रियान्वयन करे हे, वो छत्तीसगढ़ ल कृषि विकास अउ कृषक कल्याण के क्षेत्र म अग्रणी राज्य के रूप म पहिचान देही। किसान मन के सर्वागीण विकास अऊ हित मन बर लागू करे गए योजना मन बर जिला के किसान मुख्यमंत्री श्री बघेल व राज्य शासन के आभार जतावत हें।
