आदिवासी महिला मन बनिन आत्मनिर्भर
धमतरी, प्रधानमंत्री जनजातीय विकास मिशन के तहत जिला धमतरी के गांव दुगली म बने वन-धन विकास केंद्र (VDVK) आज महिला सशक्तिकरण अऊ गांव के आत्मनिर्भरता के एक सुग्घर उदाहरण बन गे हे। छत्तीसगढ़ राज्य लघु वनोपज संघ के देखरेख म चलत ए केंद्र ह वनोपज के मूल्य संवर्धन (Value Addition) के जरिया आदिवासी महिला मन ला रोजगार अऊ सम्मानजनक कमाई देवत हे।
25 किसम के दवाई अऊ खाय के सामान तइयार
दुगली वन धन विकास केंद्र ह स्व-सहायता समूह मन के संघ के रूप म काम करत हे। एक ठन मुख्य समूह ह संचालन के जिम्मेदारी सम्हाले हे, अऊ बाकी समूह मन जरूरत अऊ ऑर्डर के हिसाब ले सामान बनाय म मदद करथें। ए केंद्र म महिला मन के बढ़-चढ़ के हिस्सा लेय ले ओमन ला आर्थिक रूप ले मजबूत बने के मौका मिलिस हे।
केंद्र म अभी लगभग 25 किसम के अलग-अलग दवाई अऊ खाय के सामान तइयार करे जावत हे, जेमा हर्बल पाउडर, स्वास्थ्य पेय अऊ अउ कतको हर्बल सामान सामिल हें। सबो सामान मन ला गुणवत्ता अऊ सुरक्षा के मानक मन ला मान के बनाय जाथे। एखर बर आयुष अऊ खाद्य सुरक्षा विभाग ले जरूरी लाइसेंस घलोक मिल गे हे।
ऑनलाइन प्लेटफॉर्म ले मिलिस बड़का बाजार
खास करके एलोवेरा ले बने साबुन, क्रीम, बॉडी वॉश अऊ हैंडवॉश जइसे ‘पर्सनल केयर’ के सामान मन ह बाजार म अपन अलग पहिचान बना डरे हें। ए सामान मन के मांग ह सरलग बाढ़त हे, जेखर से महिला मन के कमाई घलोक बढ़ गे हे। छत्तीसगढ़ राज्य लघु वनोपज संघ डहर ले महिला मन ला ट्रेनिंग, मशीन, ब्रांडिंग अऊ बेचे के सुविधा देहे गे हे। एखर नतीजा हे के इहां के सामान ह राज्य स्तर के मेला, विभागीय नेटवर्क अऊ ऑनलाइन माध्यम ले बड़े बाजार तक पहुँचत हे। वित्तीय बछर 2024-25 म ए केंद्र के सालाना कारोबार 74 लाख 62 हजार 156 रुपिया दर्ज करे गिस, जेहा एकर सफलता ला बताथे।
‘छत्तीसगढ़ हर्बल’ ब्रांड के तहत बने सामान अब अलग-अलग मार्ट, चुनिंदा आउटलेट्स अऊ ऑनलाइन मिलत हे। संग म आयुष विभाग अऊ पर्यटन मंडल ला घलोक एकर सप्लाई नियमित रूप ले करे जावत हे।
गांव के क्षेत्र म आत्मनिर्भरता के सपना होइस पूरा
दुगली वन धन विकास केंद्र आज सिर्फ एक ठन सामान बनाय के जगह नई हे, बल्कि महिला सशक्तिकरण, उद्यमिता अऊ सामाजिक बदलाव के एक प्रेरणादायक कहानी बन गे हे। एहा बताथे के सरकारी योजना अऊ आपसी कोसिस ले गांव म घलोक आत्मनिर्भरता के सपना ला सच करे जा सकत हे।
