दुर्ग कलेक्टर अऊ एसपी ह दीस अन्नू ल पंद्रा लाख रूपिया के चेक

दुर्ग, कुम्हारी फ्लाईओवर हादसा म अपन माता-पिता ल गंवा डरे अन्नू देवांगन ल आज ओखर परिजन मन के उपस्थिति म पंद्रा लाख रूपिया के चेक देहे गीस। कलेक्टर श्री पुष्पेंद्र कुमार मीणा अऊ एसपी डा. अभिषेक पल्लव ह ये चेक दीन। कलेक्टर अऊ एसपी ह रायल इंफ्रा कंपनी के अधिकारी मन ले ये संबंध म चर्चा करे रहिन अऊ कहे रहिन कि अनुबंध शर्त के मुताबिक फ्लाइओवर म निर्माण के समय सुरक्षा संबंधी जिम्मेदारी कंपनी के रहिस फेर कंपनी के लापरवाही के चलते दुर्घटना होइस, ते पाए के नोनी के भरणपोषण म कम्‍पनी सहयोग करय, चर्चा म कंपनी ह एखर बर पंद्रा लाख रूपिया देहे के बात कहे रहिस। कंपनी के अधिकारी मन ह आज कलेक्ट्रेट परिसर म पंद्रा लाख रूपिया के राशि के चेक दीस। कलेक्टर ह बताइस कि एखर ब्याज के राशि ले लइका के खरचा के व्यवस्था होही, बालिग होए म मूलधन नोनी ल मिल जाही। संगेच बच्ची ल बने स्कूल म एडमिशन देवाए जाही। प्रशासन सरलग लइका के परिजन मन के संपर्क म रहिही।