दुर्ग, 26 अगस्त 2021। जन समर्पण सेवा संस्था, दुर्ग ह आज कलेक्टर डॉ. सर्वेश्वर नरेंद्र भुरे के सम्मान करिस। संस्था ह उंखर सम्मान विश्वव्यापी कोरोना महामारी (आपदा) के समय दुर्ग जिला म ऊंखर कुशल प्रबंधन के सेती कोरोना संक्रमण उपर रोकथाम म मिले सफलता ल लेके करे गीस। संस्था के अध्यक्ष योगेन्द्र शर्मा कहिन कि डिजास्टर मैनेजमेंट (आपदा प्रबंधन) कोरोना महामारी ल रोके के बने सहिन प्रबंधन करत कलेक्टर ह जइसे पहिली पूरा जिला म लॉकडाउन करे के उचित निर्णय लीन। ये निर्णय नइ होतीस त समस्या अऊ भयावह होतीस अउर संक्रमण अपन बड़ विकराल रूप म तेजी ले बगर जातिस। बंटी शर्मा ह कहिस कि कोरोना के दुसर लहर के संकट बिकटे गंभीर रहिस अऊ बहुत बड़का पैमाना म रहिस। अइसन समय म अपन कुशल नेतृत्व ले कलेक्टर ह स्वास्थ्य सुविधा मन के पुख्ता व्यवस्था करिन। मनखे मन के मनोबल ऊंचा रखे बर कड़क मेहनत करिन। एकर नतीजा देखे ल आइस अऊ थोरकेच दिन के बाद कोरोना संक्रमण ल थाम्हे म मदद मिलीस।संस्था के आशीष मेश्राम के कहना हे कि पूरा जिला आज कहूँ सुरक्षित महसूस करत हे त एकर पाछू म जिला म कोविड के उचित प्रबंधन, कोविड प्रबंधन ल लेके होए सुग्घर काम ये अऊ एला हमेशा सुरता रखे जाही। संस्था के शिबू मिर्जा ह कलेक्टर डॉ. सर्वेश्वर नरेन्द्र भुरे अऊ उंखर पूरा टीम के सराहना करत कहिन कि जिला के होम आइसोलेशन, शासकीय कोविड सेंटर, सबो शासकीय कोरोना जांच केंद्र मॉडल के रूप मे जाने गीस, जऊन ह पूरा छत्तीसगढ़ बर गरब के बात हे।
कलेक्टर डॉ. सर्वेश्वर नरेन्द्र भूरे ह बेरा बेरा म जनता के हित मे कई ठन सरहानीय फैसला लेहे हें, जेखर लाभ प्रत्यक्ष रूप ले जनता ल मिले हे अऊ अभी तक मिलत हे, ए मुताबिक जिला म सफल कलेक्टर के भूमिका रहीस। कलेक्टर ह जन समर्पण सेवा संस्था के सबो सदस्य मन ल बधाई देवत कहिन कि जनसरोकार ले जुड़े काम मन म भूमिका निभाए ले ही समाज सशक्त होथे। प्रशासन के संगेच जनभागीदारी ले विकास काम के गति तेज होथे। एकर से सामाजिक सांस्कृतिक विकास के प्रक्रिया घलोक मजबूत होथे।
एअवसर म जन समर्पण सेवा संस्था के अध्यक्ष योगेन्द्र शर्मा, अर्जित शुक्ला, आशीष मेश्राम, राजेन्द्र ताम्रकार, शिशु शुक्ला, संजय सेन, प्रकाश कश्यप, मृदुल गुप्ता, शुभम सेन, अख्तर खान, हरीश ढीमर, दद्दू ढीमर, भागवत पटेल, शब्बीर खान, आदित्य नारंग, समीर खान, शिबू खान अउर आन सदस्य उपस्थित रहिन।
कलेक्टर होए त अइसे: करोना महामारी म एक दिन नइ बैठिस घर, जनसेवा समर्पण संस्था ह करिस कलेक्टर के सम्मान
