निजी चिकित्सालय मन म बनाय गए कोविड अस्पताल म मरीज मन के उपचार अऊ सेवा के करहीं नियमित मानिटरिंग
दुर्ग, 12 सितम्बर 2020। जिला म कोविड-19 के संक्रमण, नियंत्रण अउ उपचार बर 08 निजी अस्पताल मन ल मरीज मन के उपचार के अनुमति दे गए हे। ए कोविड अस्पताल मन म मरीज मन के उपचार अऊ देहे जात सेवा मन के मानिटरिंग बर कलेक्टर डाॅ. सर्वेश्वर नरेंद्र भुरे ह नोडल अधिकारी मन के नियुक्ति करे हें। कलेक्टर ह नोडल अधिकारी मन के बैठक म कहिन के पाजिटिव मरीज मन के उपचार करके ओ मन ल बेहतर स्वास्थ्य सेवा उपलब्ध कराना हमर मुख्य उद्देश्य हे। निजी चिकित्सालय मन म बनाय गए कोविड अस्पताल म शासन के गाइड लाइन के मुताबिक उपचार होवय, एखर देखरेख बर नोडल अधिकारी मन के महती भूमिका होना चाही। उमन कहिन के सबो नोडल अधिकारी अपन निरधारित कोविड अस्पताल के नियमित मानिटरिंग करव। अस्पताल म जउन निरधारित राशि लेहे जात हे ते मुताबिक सेवा देहे जात हे के नहीं, एकर मुआयना अनिवार्य रूप ले करव। अस्पताल म उपलब्ध संसाधन, सुविधा अऊ सेवा के जानकारी लेत रहव।
कलेक्टर ह बैठक म कहिन कि ए अस्पताल मन म आइसोलेशन वार्ड सुनिश्चित होही। उमन कहिन के मरीज मन के अस्पताल म एडमिशन बर जरूरी प्रयास घलोक करव। बैठक म उमन कहिन के कोरोना मरीज के मृत्यु हो जाय के दशा म लउहे डेड बाडी ले संबंधित औपचारिकता होना चाही ताकि परिजन मन ल कोनो प्रकार के दिक्कत के सामना झन करना परय। मृत्यु हो जाय के स्थिति म ऊंखर परिजन मन ले संपर्क करके तुरंत बाडी सुपुर्द करे के कार्यवाही घलोक करव।
निजी हास्पिटल म मरीज मन ल होवइया असुविधा, रिफर संबंधी समन्वय, अस्पताल म उपलब्ध बेड के स्थिति, डेड बाडी मूवमेंट प्लान अऊ ए अस्पताल मन म मरीज मन के उपचार बर शासन कोति ले निरधारित दर ले जादा दर लेहे के शिकायत या कोनो प्रकार के असुविधा के संबंध म नोडल अधिकारी मन समन्वय अऊ निगरानी करहीं।
