-कम कीमत म जादा असरकारी दवई आम जन के हित म -कलेक्टर डॉ. सर्वेश्वर नरेंद्र भुरे
दुर्ग, जिला म धन्वंतरी योजना के अंतर्गत 18 मेडिकल सेंटर कई जगा चलाए जात हे। जेमां हरेक मेडिकल स्टोर म जिला के निवासी मन ल 50 ले 60 प्रतिशत तक के छूट म जेनेरिक अऊ ब्रांडेड दवई देहे जात हे। अभी हाल म जिला के 55 हजार 222 हितग्राही मन ह करीबन 01 करोड़ के दवई जिला म संचालित धनवंतरी मेडिकल स्टोर ले लेहे हें। इही दवई कहूं वो मन सामान्य मेडिकल स्टोर ले लेतिन त ओमा उपराहा 40 ले 60 प्रतिशत राशि अऊ देना परतिस। धन्वंतरी मेडिकल स्टोर के दुर्ग अऊ भिलाई नगर निगम के दुकान के संगें-संग आन धन्वंतरी के दुकान मन ल घलोक बहुतेच अच्छा प्रतिसाद मिलत हे।
मेडिकल स्टोर म आए रवि कुमार ह बताइस के पहिली दवा के परची हाथ म आए म हमेशा मन म शंका होत रहिस कि कतका पइसा खर्च करे म दवई मिलही। वो चिंता आज के समय म धन्वंतरी मेडिकल स्टोर ह कम कर देहे हे। वोखर घर म वोखर माता-पिता ब्लड प्रेशर अऊ शुगर के पेसेंट हे जेकर बर हर महिना करीबन 3 हजार रूपिया खरचा करना परत हे फेर शासन कोति ले संचालित धनवंतरी योजना ले वोखर परिवार ल बहुत जादा लाभ मिले हे। आज इही दवई मन वोला 14 सौ ले 18 सौ रूपिया के बीच म मिल जात हे।
दुर्ग के नलघर तीर स्थित धन्वंतरी मेडिकल स्टोर के संचालक श्री मनीष खत्री ह बताइस कि मेडिकल स्टोर म 251 प्रकार के जेनरिक दवई अऊ 27 प्रकार के सर्जिकल उत्पाद नियमित रूप ले मिलथे। मेडिकल स्टोर ले उच्च रक्त चाप, मधुमेह, अस्थमा अऊ मौसमी बीमारी मन के दवई मन के मांग म लगातार बढ़ोत्तरी होवत हे। वो ह बताइस कि एमां रक्तचाप अऊ मधुमेह के दवई सबले जादा बेंचाथे, रोजेच एकर बिक्री के आंकड़ा 7000 ले 9000 रूपिया के बीच हे। आज के भाग दौड़ के जिंदगी के चलते सबो के जीवन शैली म एक बड़का बदलाव आए हे। जेखर से बीमारी मन के संगें-संग दवई के खपत म घलोक बढ़ोत्तरी होवत हे।
कलेक्टर डॉ. सर्वेश्वर नरेंद्र भुरे ह आम जन ले अपील करे हें कि धनवंतरी मेडिकल स्टोर स्वास्थ्य समस्या ल केंद्र म रखके आम जन के हित म खोले गए हे। जेमां किफायती कीमत म गुणवत्ता वाले दवई उपलब्ध कराना शासन के मुख्य उद्देश्य हे। एखर से मनखे अपन मेहनत के कमाई ल बचा पात हें। जेनरिक दवई ल जनता के बीच लोकप्रिय बनाना अऊ ये प्रचलित धारणा ल दूर करना कि कम कीमत वाले दवई कम प्रभावी होथे। एखर खातिर जिला प्रशासन लगातार प्रचार प्रसार करत हे अऊ जिला के नागरिक घलोक एला समझत हे अऊ धन्वंतरी मेडिकल स्टोर ले दवई खरीदत हें अइसये करके जनता अपन जागरूकता के परिचय तको देवत हें।
