रायपुर, 25 अगस्त 2021। रायपुर म देर रात दुर्ग के एक कारोबारी के अपहरण करके जबरन वसुली के मामला आगू आए हे। जानबा हे के कि दुर्ग जिला के अन्नू कार्पोरेट सप्लाई कंपनी जुनवानी के पार्टनर राजबीर नयन राणा ह कटोरा तालाब स्थित लक्की हार्डवेयर के संचालक पवन मेघानी, अमित मेघानी अऊ अंकित मेघानी ल अपन कंपनी के डीलर बनाए बर 50 हजार रूपिया नगद जमा करवाए रहिस अऊ लॉकडाउन के समय माल घलोक सप्लाई करिस।
काली आरोपी तीनो भाई मन ह कंपनी के मालिक राजबीर ल रायपुर बुलवाए रहिन। जब कारोबारी राजबीर अपन कंपनी के एडवायजर इंद्रकुमार स्वर्णकार के संग लक्की ट्रेडर्स पहुंचिस त आरोपी भाई मन ह अपन दुकान के शटर बंद करके उंकर संग मारपीट करे लगिन अऊ 50 हजार रूपिया तुरंत वापस करे के जिद म अड़ गीन। उमन राजबीर के मोबाइल समेत अंगुठी घलोक झटक लीन। एखर बाद कारोबारी ह जइसे-तईसे महावीर नगर निवासी एक परिचित ले 50 हजार रूपिया मंगवा के आरोपी भाई मन ल दीस। एकर बाद सिविल लाइन थाना पहुंचके पुलिस ल अपन आपबीती बताईस, जेखर बाद पुलिस ह अपहरण करके जबरन वसुली के धारा मन म मामला दर्ज करके लक्की हार्डवेयर के संचालक पवन मेघानी, अमित मेघानी अऊ अंकित मेघानी ल गिरफ्तार कर लेहे हे।
दुरूग के ब्यापारी के रईपुर के तीन भाइ मन ह करिन अपहरण, सटर बंद करके ठठाईन
