हाईस्कूल अऊ हायर सेकेंडरी स्कूल मन के 8 हजार लइका मन ल रोजेच दीए जात हे विशेष क्लास
दुर्ग, एके कक्षा म पढ़इया सबो लईका मन के बौद्धिक स्तर एक जइसे नइ होवय। स्कूल म एके विषय म कोनो अव्वल तो कोनो औसत होथे। इहां तक के कई ठन विषय के प्रति सबो पढ़ईया लईका मन के रुचि अलग अलग होथे। कोनो ल गणित अऊ विज्ञान म रुचि होथे अऊ कोनो लइका ल भाखा या सामाजिक विज्ञान म। एकदम सीधा सवाल कोनो लइका ल पहाड़ जइसे मालूम परथे त कोनो लइका मुश्किल समीकरण ल घलोक मिनट म सुलझा लेथे। जेखर सेती पढ़ईया लईका मन के शिक्षण स्तर म सामंजस्य बइठा पाना शिक्षक बर मुश्किल तो होथेच संगेच 40 मिनट के पीरियड म हर एक लइका के संग न्याय कर पाना घलोक कठिन काम हे। इही पहेली ल सुलझाए बर स्कूल शिक्षा विभाग कोति ले मेधा अऊ आरोहण के पहल करे गए हे। ये मां कक्षा दसवीं अऊ बारहवीं के पढ़ाई बर लइका मन के मदद करे जाथे, काबर के कक्षा 10वीं अऊ 12वीं के पढ़ाईच ही तय करथे कि आगू लइका के भविष्य कऊन दिशा म अग्रसर होही। जेमां डीईओ समेत वरिष्ठ शिक्षक अवकाश दिवस म विशेष कक्षा लेथें।
आरोहण योजना म पढ़ई म कमजोर लइका मन के परेशानी के हल
आरोहण के तहत अइसे लइका मन बर उपचारात्मक शिक्षा के व्यवस्था करे गए हे जेमन ल विषय मन ल समझे म कठिनाई आथे। अइसन ए खातिर घलोक होथे कि शासकीय स्कूल मन म पढ़इया ज्यादातर लइका मन ल घर म पढ़ाई के उचित वातावरण नइ मिल पावय। कई पइत लइका ही ह औसत या कमजोर बौद्धिक क्षमता के होथे। ए सबो कारण ले कुछ लइका अकादमिक रूप ले पिछड़े लगथे। कक्षा 10 वीं अऊ 12 वीं के कक्षा के परिणाम हर लइका के भविष्य तय करत हे एखर सेती इही कक्षा मन म पढ़इया लइका मन उपर फोकस करे गए हे। आरोहण के अंतर्गत कक्षा 10 वीं अऊ 12 वीं के पढ़ईया लईका मन बर ऊंखरेच स्कूल म कक्षा सुरू होए के 1 घण्टा पहिली या बाद म उपचारात्मक शिक्षण के व्यवस्था करे गए हे। जिहां विसय खांटी जानकार कोति ले कक्षा 10 वीं अऊ 12 वीं के लइका मन ल हरेक विसय म होवइया कठिनाई ल दूर करे जाथे। एखर अलावा लइका मन के उत्साह वर्धन करे बर समय-समय म जिला स्तरीय वरिष्ठ अधिकारी घलोक कक्षा मन म आथें। जिला के 179 हाई अऊ हायर सेकंडरी स्कूल के करीब 8000 लइका मन ल ये योजना के फायदा मिलत हे।
मेधा योजना के तहत कोचिंग सेंटर मन म मिलत हे मार्गदर्शन
इही प्रकार ले मेधा के तहत मेधावी छात्र छात्रा मन के चयन करके उनला हफ्ता म 2 दिन सनिवार अऊ इतवार के अलग से मार्गदर्शन देहे जात हे। ताकि ओ मन अपन क्षमता के जइसे प्रदर्शन कर सकयं। एखर बर जिला के 3 विकासखंड मन म कक्षा 10 वीं अऊ 12 वीं के मेधावी लइका मन बर कोचिंग सेंटर के संचालन करे जात हे। दुर्ग शहर के जे आर डी शासकीय बहूउद्देशीय उच्चतर माध्यमिक विद्यालय, भिलाई शहर के शासकीय बालक उच्चतर माध्यमिक विद्यालय सुपेला, पाटन अऊ धमधा म शासकीय बालक उच्चतर माध्यमिक विद्यालय मन म प्रति सनिवार अऊ इतवार के साढ़े चार घंटा बर कक्षा लगाए जाथे। जेमां कक्षा 10 वीं के पढ़ईया लईका मन ल गणित, विज्ञान, सामाजिक विज्ञान अऊ अंगरेजी विसय के अध्यापन करवाए जात हे उहें कक्षा 12 वीं के पढ़ईया लईका मन ल गणित, फिजिक्स, केमेस्ट्री, इकोनॉमिक्स, बायोलॉजी अऊ इकोनॉमिक्स विषय म मार्गदर्शन देहे जात हे। ताकि कक्षा 12 वीं के बाद वो इंजीनयरिंग, मेडिकल, मैनेजमेंट अऊ आन क्षेत्र मन म पढ़ाई अउ कैरियर निर्माण के निर्णय आत्म विश्वास के संग ले सकयं।
