लॉकडाउन ल सफल बनाए बर पूरा सजगता ले प्रशासन ह करिस काम, नागरिक मन ले घलोक मिलीस सहयोग
दुर्ग 23 जुलाई 2020। कोरोना संक्रमण ल रोके बर लगाए गए लॉकडाउन के पहिली दिन पुख्ता व्यवस्था रहिस। पुलिस अउ निगम के दस्ता पूरा शहर म व्यवस्था के निरीक्षण बर लगे रहिस। जगा-जगा म चेकिंग प्वाइंट लगाए गए रहिस। इहां बिगर काम के घूमत मनखे मन ऊपर गाइडलाइन के मुताबिक कड़क कार्रवाई करे गीस। बिहनिया-बिहनिया अऊ संझा दुनों बेरा प्रशासन ह फ्लैगमार्च घलोक करिस। मनखे मन ल कोरोना संक्रमण ले बचाव के संबंध म जानकारी दे गीस। मनखे मन ले आग्रह करे गीस के अपन घर म ही रहव अऊ कोरोना ले सुरक्षित रहव। कोरोना वारियर्स ल घलोक अपन काम पूरा सावधानी ले करे के हिदायत दे गीस। फ्लैगमार्च नगरीय निकाय के सबो इलाका मन म करे गीस। ए दौरान कलेक्टर डाॅ. सर्वेश्वर नरेंद्र भुरे, एसपी श्री प्रशांत ठाकुर अउ आन अधिकारी उपस्थित रहिन। जानबा हे के आज लॉकडाउन ल ठऊका करे बर निगम के टीम निगम कमिश्नर अउ जोन कमिश्नर मन के सियानी म पूरा समय मॉनिटरिंग म लगे रहिस। एखर अलावा फोकट घूमत मनखे मन ऊपर घलोक कड़के कार्रवाई करे गीस। कलेक्टर डाॅ. सर्वेश्वर नरेंद्र भुरे ह लॉकडाउन के समय लगातार स्थिति ऊपर नजर रखिन अउ फीडबैक लेत रहिन। सबो एसडीएम घलोक संबंधित क्षेत्र मन म मॉनिटरिंग करत रहिन। शहर ल छोड़ के 17 गांव जिहां लॉकडाउन लगाए गए हे उहां घलोक स्थिति के मॉनिटरिंग करे गीस। संगेच ये घलोक देखे गीस के बुनियादी सुविधा मनखे मन ल मिलत रहय। एखरे संग कोविड नियंत्रण बर बनाए गए कंट्रोल रूम ले आए फीडबैक ऊपर घलोक लगातार कार्रवाई करे गीस।
