दुर्ग 21 अकटूबर 2020। केंद्रीय संयुक्त सचिव, स्वास्थ्य विभाग श्रीमती ऋचा शर्मा के सियानी म स्वास्थ्य विभाग के टीम आज दुर्ग पहुंचीस। इमन कोविड केयर ले जुड़े सेंटर के निरीक्षण करिन, संगेच कोविड केयर ले जुड़े अधिकारी मन के बैठक लीन। बैठक म उमन अब तक कोविड केयर के संबंध म जिला म कराए गये काम मन के जानकारी लीन, सुझाव दीन अऊ फीडबैक घलोक लीन। उमन कहिन के केंद्रीय दल के उद्देश्य आप मन के जिला म कोविड केयर ल लेके करे जात काम मन ल प्रोत्साहित करना हे। ये मां हम आप मन के का अऊ कइसे मदद कर सकत हन ये जानना हे। संगेच कोविड केयर ल लेके आप मन के फीडबैक घलोक ले हे जेखर से कोविड ले लड़े बर अऊ हेल्थ सिसटम ल अऊ मजबूत करे बर नीति तैयार करे जा सकय। संयुक्त सचिव ह जिला अस्पताल, शंकराचार्य हास्पिटल, जैन समाज के कोविड केयर सेंटर, फीवर क्लीनिक मन म गीन अऊ उहां मरीज मन बर करे गए इंतजाम ल देखिन। बैठक म कलेक्टर डाॅ. सर्वेश्वर नरेंद्र भुरे, जिला पंचायत सीईओ श्री सच्चिदानंद आलोक, सीएमएचओ डाॅ. गंभीर सिंह ठाकुर संग आन अधिकारी मौजूद रहिन।
प्रेजेंटेशन के माध्यम ले बताए गीस कोरोना संक्रमण के स्थिति म कइसे होए हे सुधार- स्वास्थ्य विभाग के टीम ह आंकड़ा मन के माध्यम ले बताइस के कइसे अकटूबर महिना म संक्रमण के स्थिति म सुधार होय हे। टेस्टिंग के आंकड़ा ल देखे ले सितंबर महीना के तुलना म अकटूबर महिना म प्रति सैंपल पाजिटिव मरीज मन के संख्या घटे हे। उदाहरण बर मंगलवार 20 अकटूबर के 679 रैपिट एंटीजन के सैंपल लेहे गीस, ये मां पाजिटिव 53 आइस। ये प्रतिशत सितंबर के तुलना म काफी घटे हे। मरीज मन के रिकवरी रेट तेजी से बाढे हे अऊ डेथ के संख्या घलोक तेजी ले घटे हे। स्वास्थ्य विभाग के टीम ह एकर कारण घलोक पूछिस। कलेक्टर डाॅ. सर्वेश्वर नरेंद्र भुरे ह बताइस के एखर कई संभावित कारन हो सकत हे। तेजी ले संक्रमण बढे के स्थिति म लाकडाउन लगाय के निर्णय ले गीस जऊन प्रभावी साबित होइस। होम आइसोलेशन माडल काफी सफल रहिस अऊ इहां रिकवरी शानदार हो गीस। जिला म पचास साल ले जादा आयु के मनखे मन ल संक्रमण ले बचाय बर उंखर पहिचान करे के विशेष अभियान चलिस, कोरोना के सबले घातक असर इही वर्ग उपर पड़ रहिस, व्यापक जागरूकता अभियान होए अउर घर-घर सर्वे टीम पहुंचे के सेती ए वर्ग के संक्रमित मनखे मन के चिन्हारी करे म आसानी होइस। कलेक्टर ह बताइस के सबले पहिली दुर्ग म होम आइसोलेशन म रहइया मनखे मन के मानिटरिंग बर कंट्रोल रूम बनाए गीस। ये बहुत प्रभावी माडल साबित होइस। होम आइसोलेशन बर 7901 मरीज मन ल अनुमति दे गइस। एमां 7014 रिकवर हो गे। 341 ल रिफर करे गीस।
6 मिनट वाक टेस्ट वीडियो के प्रशंसा करिन, जागरूकता अभियान के चिनहा बनिस दुर्गा के प्रशंसा- कलेक्टर ह बताइस के होम आइसोलेशन म रहइया मनखे मन के आक्सीजन लेवल म विशेष फोकस करे गीस। एखर बर 6 मिनट वाक टेस्ट के वीडियो घलोक तैयार करे गीस। ये मां वाक के पहिली अऊ बाद आक्सीजन लेवल के आक्सीमीटर के साथ जांच करना रहिस। संयुक्त सचिव ह एखर प्रशंसा करिन। कलेक्टर ह बताइस के अगले सौ दिन बिकट सावधानी भरे हे काबर के इही दौरान त्योहार अवैया हे। ये मां सोशल डिस्टेंसिंग के संबंध म जागरूकता बढ़ाये अऊ एखर बर आईसीई प्लान तैयार करे गए हे। नन्ही दुर्गा एखर चिनहा हे।
