दुर्ग जिला ल 253 करोड़ रुपिया के लागत वाले विकास अऊ निर्माण काम मन के मिलही सौगात
रायपुर, 01 अकटूबर 2020। मुख्यमंत्री श्री भूपेश बघेल गांधी जयंती के अवसर म काली 2 अकटूबर के दुर्ग जिला म विकास के नवा इबारत गढ़इया हें जेमा कई अधोसंरचना मन के सौगात देहीं। मुख्यमंत्री श्री बघेल अपन निवास कार्यालय ले वीडियो कॉनफ्रेसिंग के माध्यम ले पाटन-सांकरा, दुर्ग अऊ भिलाई म कुल 253 करोड़ 61 लाख रुपिया के लागत वाले 39 निर्माण काम मन के भूमिपूजन अऊ लोकार्पण करहीं। ये मां प्रमुख रूप ले महात्मा गांधी उद्यानिकी अऊ वानिकी विश्वविद्यालय, सांकरा-पाटन के भूमिपूजन सामिल हे। करीबन 55 करोड़ रुपिया के लागत ले बनइया विश्वविद्यालय ले राज्य म उद्यानिकी विकास ल बढ़ावा मिलही अऊ रोजगार अऊ स्वालंबन के नवा दुवार खुलही। ए उद्यानिकी विश्वविद्यालय म हर साल करीबन 600 स्नातक, 100 स्नातकोत्तर अऊ 50 पीएचडी पढ़ईया लईका मन ल प्रवेश मिलही। ए विश्वविद्यालय के माध्यम ले राज्य ल उद्यानिकी अऊ वानिकी के क्षेत्र के दक्ष मानव संसाधन उपलब्ध होही जऊन छत्तीसगढ़ राज्य ल फल-फूल सब्जी, मसाला अऊ उद्यानिकी उत्पाद म आत्मनिर्भर बनाके राज्य के अर्थव्यवस्था ल नवा आयाम दे म मददगार साबित होही।
पाटन म होही 77 करोड़ 28 लाख रुपिया के काम मन के लोकार्पण-भूमिपूजन
ग्राम सेलुद म होही सोलर चरखा प्रशिक्षण केन्द्र के शुभारंभ
मुख्यमंत्री सांकरा-पाटन म महात्मा गांधी विश्वविद्यालय के भूमिपूजन के संगेच ब्लाक मुख्यालय म शासकीय अधिकारी-कर्मचारी मन के रहे बर 5 करोड़ 22 लाख रुपिया के लागत ले बनाये गए कुल 44 घर के लोकार्पण करहीं। एखर संगेच खारुन नदी म 8 करोड़ 35 लाख रुपिया के लागत ले उफरा ले रवेली मार्ग म उच्चस्तरीय पुल अऊ खम्हरिया नाला म अभनपुर-तर्रीघाट पाटन मार्ग म खम्हरिया नाला म 8 करोड़ 17 लाख रूपिया ले बनइया उच्चस्तरीय पुल के निर्माण काम के भूमिपूजन करहीं। ए पुल के बने ले 50 गांव मन के लगभग एक लाख ले जादा आबादी ल बारहमासी आवागमन के सुविधा मिलही। लगभग 37 लाख लागत ले बनइया सहकारी बैंक के झीट शाखा के नवा भवन के भूमिपूजन घलोक होही। जेखर से लगभग 5 हजार ले जादा किसान मन ल बैंकिंग सुविधा के अलावा समर्थन मूल्य म धान खरीदी, राजीव गांधी किसान न्याय योजना, गोधन न्याय योजना अऊ अमानत ऋण वितरण म सुविधा मिलही। पाटन विकासखण्ड के ग्राम सेलूद म मुख्यमंत्री श्री बघेल सोलर चरखा प्रशिक्षण केन्द्र के शुभारंभ घलोक करहीं। एखर से आसपास के गांव मन के महिला मन ल सोलर चरखा के प्रशिक्षण दे जाही। जेखर से रोजगार के नवा अवसर घलोक उपलब्ध होही।
दुर्ग म 138 करोड़ 35 लाख रुपिया के काम मन के लोकार्पण-भूमिपूजन
मुख्यमंत्री दुर्ग शहर म 138 करोड़ 35 लाख रुपिया के काम मन के लोकार्पण भूमिपूजन करहीं। मुख्यमंत्री दुर्ग के ठगड़ा बांध सौदर्यीकरण बर होत 13 करोड़ 49 लाख रुपए के लागत वाले विकास अऊ निर्माण काम मन के आधारशिला रखहीं। ठगड़ा बांध के गहरीकरण ले शहर के जल स्तर बाढ़ही। उन्हे सौंदर्यीकरण ले दुर्ग के संगे संग भिलाई अऊ रिसाली के मनखे मन बर सुविकसित वाटर बाडी के संग मनोरंजन स्थल उपलब्ध होही। नागरिक सुविधा अऊ ट्रैफिक के दबाव कम करे अऊ सुंदरता बढ़ाने नेहरू चौक से मिनी माता चौक तक 8 किमी मार्ग के सुदृढ़ीकरण अऊ सौंदर्यीकरण काम के भूमिपूजन होही, एखर लागत 68 करोड़ 16 लाख रुपिया होही। अइसनहे पुलगांव नाका ले अंजोरा तक साढ़े छह किमी फोरलेन निर्माण के भूमिपूजन होही। एखर लागत 56 करोड़ 39 लाख होही।
मुख्यमंत्री दुर्ग शहर के इंदिरा मार्केट सब्जी मंडी म 66.50 लाख रूपिया के लागत ले शेड निर्माण काम, पोटिया म 29.63 लाख रूपिया के लागत ले अऊ वाय शेप ओव्हर ब्रिज के नीचे स्थित फिल्टर प्लांट के सामने 16.54 लाख रूपिया के लागत ले उद्यान निर्माण के भूमिपूजन करहीं। सब्जी मंडी म आधुनिक शेड निर्माण ले सब्जी विक्रेता अऊ आम मनखे मन ल जहां सुविधा मिलही उहें पोटिया म उद्यान निर्माण ले मार्निंग वॉक अऊ आक्सीजोन के सुविधा मिलही। मुख्यमंत्री मछली विभाग के नवनिर्मित प्रशिक्षण हॉल सह भण्डार कक्ष के लोकार्पण घलोक करहीं। लगभग 29.97 लाख रूपिया के लागत ले बनाय गए ए भवन म 100 मत्स्य कृषक मन के प्रशिक्षण अऊ उपकरण के भण्डारण के सुविधा मिलही।
भिलाई म 37 करोड़ रूपिया के 28 कार्य मन के लोकार्पण-शिलान्यास: गांधी प्रतिमा के होही अनावरण
मुख्यमंत्री श्री भूपेश बघेल ए मौका म राष्ट्रपिता महात्मा गांधी के प्रतिमा के अनावरण करे के संगेच नगर पालिक निगम क्षेत्र भिलाई म लगभग 37 करोड़ रूपिया के 28 कार्य के लोकार्पण अऊ भूमिपूजन करहीं। एखर अलावा खुर्सीपार भिलाई म 4 करोड़ 65 लाख रूपिया के लागत ले बनइया नवीन महाविद्यालय भवन के भूमिपूजन होही।