- खाद्यान्न आपूर्ति बर बनाय गए कंट्रोल रूम के लीन जायजा
रायपुर 30 मार्च 2020। छत्तीसगढ के मुख्यमंत्री श्री भूपेश बघेल ह आज लाकडाउन के समय जरूरी जिनिस, खाद्यान्न अउ साग-भाजी मन के उचित मूल्य के उपलब्धता के जायजा लेहे खुदे राजधानी रायपुर के सड़क मन म निकलिन।
मुख्यमंत्री ह रावणभाटा स्थित अन्तर्राज्यीय बस स्टैंड तीर सब्जी विक्रेता मन अउ खरीददार मन ले बातचीत करके सब्जी के दाम अउ विक्रय के जानकारी लीन। एखर बाद मुख्यमंत्री ह बूढा तालाब तीर इंडोर स्टेडियम म जरूरतमंद, बेसहारा अऊ असहाय मनखे मन के खाद्यान्न आपूर्ति बर बने कंट्रोल रूम अऊ आपात कालीन फूड सप्लाई सेल के जायजा लीन। ये फूड सप्लाई सेल, जिला प्रशासन के मार्गदर्शन म स्वयं सेवी संस्था अऊ संगठन मन के मदद ले 24 घंटा काम करत हे अऊ चुरे जेवन जरूरतमंद मनखे मन ल बांटत हे। ये व्यवस्था म करीब 140 स्वयं सेवी संगठन अऊ करीब 5 हजार वालेंटियर्स लगे हें। उमन ये काम ल बिकट सहराईन।
मुख्यमंत्री श्री भूपेश बघेल ह नवा अंतर्राज्यीय बस स्टैंड परिसर म स्थापित करे सब्जी बाजार म सब्जी विक्रेता मन ले बातचीत करिन। उमन खरीददार अउ विक्रेता मन ले साग-भाजी मन के कीमत जानिन। सब्जी विक्रेता मन ह बताइन के साइंस कॉलेज मैदान म थोक मार्केट लगे हे उहां ले साग-भाजी लाके बेचत हें। मंडी म आलू प्याज करीबन 30 रूपिया किलो हे अऊ साग-भाजी मन के दाम घलोक कम हो गे हे। हम आप ल बता देवन के रायपुर के टिकरापारा, संतोषी नगर, नदी चौक अऊ भांटा गांव के अव्यवस्थित अऊ भीड-भाड वाले बाजार मन ल बंद करके नवा अंतर्राज्यीय बस स्टैंड परिसर म सोशल डिस्टेंसिंग मेंटेन करके बाजार लगाए जात हे।
इंडोर स्टेडियम के कंट्रोल रूम म अधिकारी-कर्मचारी मन ह बातचीत म बताइन के जइसनहे कोनो सूचना मिलथे वइसेच भोजन आदि के व्यवस्था करे जात हे। दानदाता मन ले मिलत राशन सामान के किट घलोक तियार करे जात हे जेला जरूरतमंद मनखे मन अऊ श्रमिक मन ल बांटे जाही। राष्ट्रीय आजीविका मिशन के अंतर्गत सेल्फ हेल्प ग्रुप कोति ले मास्क तियार करे जात हे। ए मन ल घलोक बांटे जात हे। उमन कहिन कि काल ले राशन दुकान मन ले 2 महिना के चावल के वितरण चालू कर दे जाही।
मुख्यमंत्री ह छत्तीसगढ़ के जऊन मनखे या श्रमिक बाहिर गे हे, उंखर से अपील करे हें के ओ मन जिहां हे, उहें रहयं ऊंखर बर सबो व्यवस्था स्थानीय जिला प्रशासन के माध्यम ले सुनिश्चित करे जाही। उमन प्रदेशवासी मन ले घलोक अपील करे हें के ओ मन लॉकडाउन के पालन करयं अऊ अपन घर म ही रहयं। ओ मन ल सबो जरूरी समान उपलब्ध होत रइही।
भ्रमण के समय मुख्यमंत्री ह कलेक्टर डॉ. एस. भारतीदासन अऊ एसपी मो. आरिफ शेख, नगर निगम रायपुर के कमिश्नर श्री सौरभ कुमार, जिला पंचायत के मुख्य कार्यपालन अधिकारी डॉ. गौरव सिंह ले व्यवस्था मन के बारे म जानकारी लीन। अधिकारी मन ह बताइन के भिखारी, बेसहारा, जरूरतमंद, दिहाड़ी मजदूर, मंदबुद्धि अऊ रोजी-रोटी बर बाहिर नइ जा सकत मनखे मन बर स्पेशल फूड सेल के स्थापना करे गए हे। भोजन पहुंचाए बर बड़का नेटवर्क तियार करके शहर के हर छोर तक अपन पहुंच बनाए गए हे। सबले बड़े बात हे के ये काम म स्वयंसेवी संस्था, सेवाभावी संगठन अऊ नागरिक घलोक आगू आके मदद करत हें। नगर निगम के सबो 8 जोन म नियंत्रण कक्ष स्थापित करे गए हे, जऊन अइसन परिवार मन के चिन्हारी करत हे। जिंकर मेर राशन कार्ड नइ हे या खाद्यान्न लेहे म असुविधा होवत हे या अइसन परिवार जिंकर पास राशन कार्ड उपलब्ध नइ हे श कोनो आन कारन से राशन नइ लेहे पावत हें, अइसन परिवार के सहायता बर अभी हाल म 15,000 अनाज के पैकेट तियार कराए जात हे, जेखर से उंखर जरुरत पूरा हो सकय।
