- सदन म ध्वनि मत ले 4546 करोड़ रूपिया के दूसर अनुपूरक बजट पारित
- राजनांदगांव मेडिकल कॉलेज भवन बर 76 करोड़, अम्बिकापुर मेडिकल कॉलेज भवन बर 50 करोड़ रूपिया के प्रावधान
- विकासमूलक काम मन म व्यय के मामला म छत्तीसगढ़ देश म पहिली
- सामाजिक क्षेत्र म व्यय राष्ट्रीय औसत ले जादा
- श्री राम वन गमन रस्ता निर्माण परियोजना के काम जल्दी होही चालू
रायपुर, मुख्यमंत्री श्री भूपेश बघेल ह आज विधानसभा म राज्य सरकार के साल 2019-20 के दूसर अनुपूरक बजट म होइस चर्चा के जवाब देवत कहिन कि हम साफ नीयत ले किसान मन के संग खड़े हन, ऊंखर संग न्याय होही अऊ उंखर खीसा म प्रति कुंटल धान के 2500 रूपिया जाही। किसान मन ल धान के समर्थन मूल्य अऊ 2500 रूपिया के अंतर के राशि देवाए बर नवा योजना शुरू करे जाही। सदन म चर्चा के बाद ध्वनि मत ले 4 हजार 546 करोड़ 81 लाख 61 हजार 521 रूपिया के दूसर अनुपूरक बजट पारित कर दे गीस।
श्री बघेल ह कहिन कि राज्य सरकार ह जऊन पांच सदस्यीय मंत्रिमंडलीय उपसमिति गठित करे हे, ये समिति बजट सत्र के पहिली अपन रिपोट देही अऊ हम किसान मन ल धान के 2500 रूपिया देवाए बर नवा योजना चालू करबोन, जेखर प्रावधान बजट म करे जाही। किसान मन के खाता म समर्थन मूल्य के संग अंतर के राशि घलोक डारे जाही। मुख्यमंत्री ह कहिन कि किसान मन के कोनो भुगतान बकाया झन रहय। ये ठउका करे बर दूसर अनुपूरक म धान उत्पादन म प्रोत्साहन बर 210 करोड़ के प्रावधान रखे गए हे। दूसर अनुपूरक ल मिलाके राज्य सरकार के साल 2019-20 के बजट के आकार बाढ़के एक लाख 4 हजार 787 करोड़ रूपिया हो गए हे।
श्री बघेल ह कहिन कि छत्तीसगढ़ के वित्तीय प्रबंधन देश के आन राज्य मन ले बनेच स्थिति म हे। उमन भारतीय रिजर्व बैंक कोति ले राज्य मन के वित्तीय स्थिति म जारी साल 2019-20 के प्रतिवेदन के उल्लेख करत कहिन कि कुल बजट म ले विकासमूलक काम मन म व्यय के मामला म छत्तीसगढ़ देश म पहिली स्थान म हे। छत्तीसगढ़ म कुल बजट म ले सामाजिक क्षेत्र म व्यय राष्ट्रीय औसत ले जादा हे। छत्तीसगढ़ म कुल ऋण दायित्व अऊ ब्याज भुगतान सबो राज्य मन ले सबले कम हे अऊ छत्तीसगढ़ म कुल बजट म ले कमिटेड व्यय घलोक देश के सबो राज्य मन ले सबले कम स्तर म हे।
मुख्यमंत्री ह कहिन कि कांक्रीट के जंगल बनाना नइ हे, भलुक मनखे के विकास हमर लक्ष्य हे। दूसर अनुपूरक म उन मुद्दा मन ल सामिल करे गए हे, जेकर अगोरा प्रदेश के जनता 19 बछर ले करत आत हे। श्री राम वन गमन रस्ता निर्माण अऊ उन्नयन परियोजना के काम तुरंते चालू करे बर दूसर अनुपूरक म 5 करोड़ रूपिया के प्रावधान करे गए हे। ये मार्ग ल विकसित करे बर 92 करोड़ के कॉन्सेप्ट प्लान तियार करे गए हे। श्री बघेल ह कहिन कि स्वामी विवेकानंद ह सबले जादा बेरा रायपुर म बिताए रहिन। साल 1877 ले 1879 तक ओ मन रायपुर के बूढ़ापारा स्थित डे भवन म रूके रहिन। ये भवन ल ‘स्वामी विवेकानंद स्मृति संस्थान’ के रूप म विकसित करे जाही। एखर बर दूसर अनुपूरक म एक करोड़ रूपिया के प्रावधान करे गए हे। महिला अऊ लइका मन के विरूद्ध अपराध प्रकरण मन के जल्दी सुनवाई बर फास्ट-ट्रेक कोर्ट के स्थापना बर दूसर अनुपूरक म 10 करोड़ रूपिया के प्रावधान करे गए हे। श्री बघेल ह कहिन कि अमृत मिशन योजना के अंतर्गत नगरीय क्षेत्र मन म शुद्ध पेयजल व्यवस्था सिवरेज, पार्क आदि मूलभूत सुविधा मन बर दूसर अनुपूरक म 300 करोड़ रूपिया के प्रावधान करे गए हे। नगरीय निकाय मन के जल आवर्धन योजना बर 25 करोड़ रूपिया के, स्वच्छ भारत मिशन म सॉलिड वेस्ट मैनेजमेंट बर 17 करोड़ रूपिया के प्रावधान करे गए हे। बिजली के घरेलू उपभोक्ता मन ल 400 यूनिट तक के बिजली बिल म आधा छूट के योजना बर दूसर अनुपूरक म 282 करोड़ रूपिया, स्टील उद्योग मन के रियायती पैकेज बर 424 करोड़ रूपिया के प्रावधान करे गए हे। शासकीय चिकित्सा महाविद्यालय राजनांदगांव के भवन निर्माण बर 76 करोड़, मेडिकल कॉलेज अम्बिकापुर भवन बर 50 करोड़ रूपिया के प्रावधान करे गए हे। एकीकृत बाल विकास परियोजना म मानदेय भुगतान बर 164 करोड़ रूपिया अऊ अनुसूचित जनजाति पोस्ट मैट्रिक छात्रवृत्ति बर 89 करोड़ रूपिया के प्रावधान करे गए हे।
मुख्यमंत्री श्री बघेल ह कहिन कि राज्य के अपन सीमा अऊ भारतीय संविधान म कहूं कोताही होथे त राज्य के उपाय मन के दायरा ल बढ़ाना परथे। पाछू 15 बछर म जनता ल अपन जर ले काटे के षडयंत्र करे गीस, ओखर से निजात देवाए के हमर अभियान सबले पहिली अभियान रहिस, जऊन जारी हे अऊ जारी रहिही। ये क्रम म हमन सिरिफ हरेली, तीजा-पोरा, विश्व आदिवासी दिवस, भक्त माता कर्मा जयंती, छठ पूजा, भाई दूज (मातर) जइसे तिहार मन ल अपन माटी के सुगंध ले ही नइ जोड़ेंन, भलुक अब एकर विस्तार घलोक करत हंन। उमन कहिन कि छत्तीसगढ़ लोक रंग के धरती हे। हमार इहां छत्तीसगढ़ी, गोंडी, हल्बी, दोरली, सरगुजिया हर बोली-भाषा के अपन संसार हे अऊ सबके अपन ऊंचाई हे। हमला मौका मिले हे त हमन डॉ. नरेन्द्र देव वर्मा के रचे ‘अरपा पैरी के धार ल गीत ल राजगीत के गौरव देन। जऊन जइसे हमन हरेली ल बचाएन, राजिम मेला ल बचाएन वइसनहे छत्तीसगढ़ के हर अंचल के बोली-भाषा-संस्कृति-साहित्य सब हम बचाबोन। मुख्यमंत्री ह ये संदर्भ म कवि मीर अली मीर के कविता के घलोक उल्लेख करिन। उमन कहिन कि पहली पइत आदिवासी संस्कृति के संरक्षण अऊ प्रोत्साहन बर रायपुर म राष्ट्रीय आदिवासी नृत्य समारोह के आयोजन करे जात हे। राष्ट्रीय युवा अऊ खेल महोत्सव के विकासखण्ड, जिला अऊ राज्य स्तर म आयोजन करे जात हे। उमन कहिन कि नागरिक मन ल बनेच स्वास्थ्य सुविधा मुहैया कराए बर डॉ. खूबचंद बघेल स्वास्थ्य योजना शुरू करे जाही। जेमां 5 लाख रूपिया तक वार्षिक इलाज के सुविधा मिलही। ये योजना के लाभ प्रदेश के करीबन 56 लाख पात्र परिवार मन ल मिलही। दुर्लभ बीमारी मन के इलाज बर मुख्यमंत्री विशेष स्वास्थ्य सहायता योजना चालू करे जाही। जेखर तहत इलाज बर 20 लाख रूपिया तक आर्थिक सहायता दिए जाही।
श्री बघेल ह मुख्यमंत्री सुपोषण योजना, मुख्यमंत्री शहरी स्लम स्वास्थ्य योजना, मुख्यमंत्री हाट बाजार क्लिनिक योजना अऊ ग्रामीण अर्थव्यवस्था ल मजबूत बनाए बर चालू के गीस ‘नरवा, गरूवा, घुरवा, बाड़ी’ के प्रगति के जानकारी दीन।