राजस्व मंत्री टंक राम वर्मा ह लीन विभागीय समीक्षा बैठक
रायपुर, 14 जून 2024। छत्तीसगढ़ म राजस्व प्रशासन ल चुस्त-दुरूस्त करे के काम शुरू कर देहे गए हे। राज्य म अब डिजिटल क्रॉप सर्वे बर तियारी करे जात हे, ए सर्वे ल अंजाम देहे बर राजस्व विभाग कोति ले जमीन के जियो-रेफ्रेंसिंग के काम तेजी से चलत हे। एक कोति जियो-रेफ्रेंसिंग ले जमीन विवाद मन म कमी आही। उहें दुसर कोति फसल के ई-गिरदावरी के काम आसान हो जाही।
जानबा हे कि मुख्यमंत्री श्री विष्णु देव साय ह राज्य म सुशासन बर पारदर्शी अऊ बेहतर प्रशासन बर शासकीय काम-काज म जादा ले जादा आईटी के उपयोग करे के निर्देश सबो विभाग मन ल देहे हें। मुख्यमंत्री के मंशा के मुताबिक राजस्व मंत्री श्री टंकराम वर्मा ह राजस्व विभाग के समीक्षा बैठक म राजस्व अधिकारी मन ल जमीन के जियो-रेफ्रेंसिंग के काम लउहे पूरा करवाए के हुकुम देनहे हें।
भ्रष्टाचार के शिकायत म होही कार्यवाही– राजस्व मंत्री श्री टंकराम वर्मा ह बैठक म कहिन कि गांव वाले मन अऊ किसान मन ल नामांतरण, बटवारा, सीमांकन अऊ व्यपवर्तन काम म कोनो प्रकार के दिक्कत नइ होनी चाही। उमन कहिन कि सबो अधिकारी जनता के दिक्कत ल पूरा संवदेनशीलता के संग दूर करे बर तैयार रहव। उमन कहिन कि भ्रष्टाचार के शिकायत पाए म सख्त कार्रवाई करे जाही। उमन राजस्व विभाग के अधिकारी-कर्मचारी ल अपन कार्यशैली म बदलाव लाय के निर्देश दीन। उमन कहिन कि शैक्षणिक सत्र ल ध्यान रखत सबो राजस्व अधिकारी सुनिश्चित करव कि लइका मन ल आय अऊ जाति प्रमाण पत्र बर भटकना झन परय।
भू-अभिलेख म गलती सुधार बर अभियान चलही– राजस्व मंत्री श्री वर्मा ह कहिन कि अविवादित नामांतरण प्रकरण मन के निराकरण म ये देखे गए हे कि अइसन प्रकरण मन ल बिना कोनो कारण के अनावश्यक खारिज करे जात हे। अइसन प्रकरण मन म नियमानुसार कार्यवाही करे जाय। उमन कहिन कि किसान मन के भू-अभिलेख म गलती सुधार बर अभियान चलाए जाय, एखर बर पंचायत स्तर म आवेदन लेके ओखर निराकरण करे जाए। उमन युवा मन ल रचनात्मक गतिविधि मन ले जोड़े बर राज्य के सबो जिला मन म जिला स्तरीय खेल आयोजन बर मैदान के चिन्हारी करे के निर्देश दीन।
राजस्व प्राप्ति बढ़ाए उपर जोर – राजस्व मंत्री श्री वर्मा ह कहिन कि राज्य सरकार ल कई ठन स्त्रोत ले होवत राजस्व प्राप्ति मन म वृद्धि बर हरसंभव प्रयास करे जाए। राजस्व प्राप्ति बढ़ाए बर पारदर्शिता अऊ ईमानदारी ले काम होवय। डायवर्सन जमीन के लंबित शुल्क वसूली करे जाय। जादा राजस्व प्राप्ति मन ले ही विकास अऊ जनकल्याणमूलक काम मन ल गति मिलही।
राजस्व मामला मन के निराकरण बर ठोस रणनीति – समीक्षा बैठक म राजस्व विभाग के सचिव श्री अविनाश चंपावत ह कहिन कि राज्य म राजस्व संबंधी प्रकरण मन के तेजी ले निराकरण बर ठोस रणनीति बनाय जात हे। संचालक श्री रमेश शर्मा ह बताइस कि भुइँया सॉफ्टवेयर म राजस्व रिकार्ड अपडेट हे। संगेच जमीन मन के स्थायी चिन्हांकन बर चांदा-मुनारा निर्माण करे के काम तेजी ले करे जात हे।