- गांधी जी कहत रहिन मातृ भाखा म शिक्षा लइका मन के शैक्षणिक विकास बर जरूरी
रायपुर, मुख्यमंत्री श्री भूपेश बघेल ह कहिन कि मातृभाषा म प्रारंभिक शिक्षा सबले अहम हे, एकरे खातिर स्कूल मन म नींव प्रोजेक्ट के शुरूआत करे गए हे। मुख्यमंत्री आज भिलाई के वैशाली नगर उच्चतर माध्यमिक शाला म आयोजित नींव अऊ भाखा पिटारा कार्यक्रम ल सम्बोधित करत रहिन। उमन कहिन कि जब लइका स्कूल आथे त ओ मन अपन मातृभाषा घलोक लेके आथें। एकदम से दुसर भाखा म सिखाए बात ल ओ मन ल समझे म दिक्कत होथे। लइका ये प्रक्रिया ले सहज हो सकयं। एखर बर नींव प्रोजेक्ट सुरू करे गए हे। ये मां न केवल लइका मन ल मातृभाषा के माध्यम ले सिखाए जात हे भलुक पढ़े के संग म ऊंखर भीतर सोच-विचार के प्रक्रिया ल घलोक जगा दिए जात हे ताकि लइका के कल्पनाशीलता बाढ़य, वो चीज मन ल बनेच तरीका ले समझ सकयं, बनेच तरीके ले अभिव्यक्त कर सकयं अऊ पूरा आत्मविश्वास ले अपन अभिव्यक्ति कर सकयं।
श्री बघेल ह मातृभाषा म शिक्षा के उपयोगिता के सुंदर उदाहरण दीन। उमन कहिन कि थोकन देर पहिली मैं लइका मन ल भौंरा के एक कहानी बतावत रहेंव। मैं ह एक लइका ले पूछेंव कि ये का हे। ओ ह बताइस कि ये लट्टू हे। मैं ह कहेंव कि ये भौंरा ये त ओ हर स्पष्ट कहिस कि ये लट्टू हे। ओ ह अपन मातृभाषा म एला लट्टू के रूप म सीखे हे। अपन मातृभाषा ह ही ओला ये आत्मविश्वास देहे हे कि वो पूरा प्रखरता ले अपन बात रखत हे। गांधी जी घलोक मातृभाषा म शिक्षा ल महत्व देवत रहिन। हमन एला अपनाए हन। नींव प्रोजेक्ट एही दिशा म स्कूल शिक्षा विभाग कोति ले सुरू करे गए हे। लइका मन के समझ अऊ भाखा ज्ञान के विकास एखर से तेजी ले होही।