मोहला-मानपुर-अंबागढ़ चौकी, छत्तीसगढ़ के मोहला-मानपुर-अंबागढ़ चौकी जिला म हरियाली ह गांव वाले मन के आर्थिक स्थिति बदल देहे हे। वन विभाग के योजना मन ले साल 2024–25 म न सिरिफ जंगल मन के विस्तार होए हे, बल्कि हजारों परिवार मन ल आय, सुरक्षा अऊ विकास के नवा अवसर घलोक उपलब्ध कराए गए हे। प्रदेश म पर्यावरण संरक्षण अऊ ग्रामीण आजीविका ल जोड़े के ये पहल अब एक सफल मॉडल बनके उभरे हे।
तेंदूपत्ता संग्रहण ले मिलीस 63 करोड़ ले जादा के कमई
जिला के 76,105 संग्राहक परिवार मन ह 1,16,133 मानक बोरा तेंदूपत्ता संग्रहित करके कुल 63 करोड़ 87 लाख 31 हजार रुपिया के आय अर्जित करे हे। ये राशि ए परिवार मन खातिर आजीविका के प्रमुख साधन बनिस अऊ ग्रामीण अर्थव्यवस्था ल मजबूत आधार देहे हे। वन समिति मन ल घलोक विदोहन लाभांश के 20 प्रतिशत यानी 38.59 लाख रुपिया विकास काम मन खातिर देहे गे हे।
किसान वृक्ष मित्र योजना ले खेत मन म हरियाली अऊ जेब म आमदनी
किसान मन ह 710 एकड़ राजस्व जमीन म 4,48,220 पौधा लगाके अकतहा आय के नवा रद्दा खोले हे। 642 किसान मन ल ए योजना ले सीधा आर्थिक मदद मिलीस। उहें “एक पेड़ मां के नाम” पहल के तहत 1,55,044 पौधा बांटे गीस, जेन हर पर्यावरण संरक्षण के संग सामाजिक जुड़ाव के मजबूत संदेश दीस।
लघु धान्य ले बाढि़स आदिवासी मन के आमदनी
कोदो, कुटकी अऊ रागी जइसे पारंपरिक लघु धान्य के संग्रहण म 502 संग्राहक मन ल 3,041 क्विंटल उपज के बलदा 97 लाख रुपिया मिलिस। एखर से न सिरिफ जैविक खेती ल बढ़ावा मिलीस, बल्कि आदिवासी परिवार मन के आय घलोक बाढि़स।
महिला मन अऊ लइका मन ल मिलीस सशक्तिकरण के नवा आधार
वन क्षेत्र मन म काम करइया 38,094 महिला मनल चरण पादुका बांटे गीस, जेखर से ऊंखर स्वास्थ्य अऊ सुरक्षा म सुधार होइस। सामाजिक सुरक्षा योजना मन के तहत 574 संग्राहक मन ल 5 करोड़ 21 लाख 72 हजार रुपिया देहे गीस। शिक्षा क्षेत्र म घलोक वन विभाग ह बड़ा कदम उठाइस अऊ 484 वनवासी पढ़ईया लईका मन ल 58.33 लाख के छात्रवृत्ति देहे गीस, जेखर से ऊंखर सपना ल नवा दिशा मिलीस।
दूरस्थ गांव मन तक पहुंचिस विकास के सड़क
वामपंथ प्रभावित क्षेत्र मन म बुनियादी सुविधा मन के विस्तार करत 4 रपटा, 4 पुलिया अऊ 3 सीसी रोड के निर्माण करे गीस। एखर से पहुंच विहीन गांव मुख्यधारा ले जुडि़स अऊ आर्थिक गतिविधि मनल गति मिलीस। संपूर्ण रूप ले, वन विभाग के ए पहल ह मोहला जिला म हरियाली के संग आर्थिक खुशहाली के एक नवा अध्याय लिख देहे हे।
