15 ले 17 रूपिया म मिलही मास्क
रायपुर, 21 मार्च 2020, नोवल कोरोना वायरस (कोविड-19) ले संक्रमण के रोकथाम अउ नियंत्रण बर मास्क के आपूर्ति ल पूरा करे के बीड़ा उठाए हे प्रदेश के महिला स्व-सहायता समूह मन ह। महिला समूह मन कोति ले ईको फ्रेंडली अऊ रियूजेबल मास्क तियार करे जात हे जऊन स्वास्थ्य के दृष्टि ले एकदम सही हे।
सरगुजा जिला के महिला स्व-सहायता समूह कोति ले तियार ये मास्क आम जनता ल किफायती दर म उपलब्ध होवत हे। एखर बर जिला के सबो सात विकासखण्ड म करीबन 25 स्व सहायता समूह के महिला मन कोति ले स्थानीय सामान के मदद ले तीन पुरूत कपड़ा के मास्क तियार करे जात हे। ए मन ल 15 ले 17 रूपिया म बिक्री करे जात हे। मास्क तियार करे म अम्बिकापुर विकासखंड के एकता, संतोषी, साईबाबा स्व-सहायता समूह, लखनपुर विकासखण्ड के आरती, नारीशक्ति, गायत्री स्व-सहायता समूह, उदयपुर विकास खंड के दुर्गा स्व सहायता समूह, मैनपाट विकास खंड के जय मां बूढ़ी दाई स्व-सहायता समूह लुण्ड्रा विकासखंड के प्रीति, तारा स्व सहायता समूह संग विकासखंड बतौली अऊ सीतापुर के करीब 25 स्व सहायता समूह के महिला मन अपन योगदान दवत हें।
स्व-सहायता समूह के महिला मन ल बिहान के माध्यम ले जरूरी सहयोग देहे जात हे। बिहान के जिला कार्यक्रम अधिकारी श्री राहुल मिश्रा ह बताइस के स्व सहायता समूह के महिला मन के बनाये गए कपड़ा के मास्क पर्यावरण अनुकूल हे अऊ एला 8 घंटा उपयोग करे के बाद एंटीसेप्टिक संग पानी ले धोके फेर उपयोग करे जा सकत हे।
अइसनहे धमतरी जिला म महिला मन ल स्वास्थ्य विभाग ह कपड़ा उपलब्ध कराए हे। जेखर से महिला समूह ह रियूजेबल मास्क तियार करत हें। रियूशेबल मास्क के खासियत ये हे के स्वास्थ्य विभाग ले मिले हरियर रंग के कपड़ा साइंटिफिक एप्रूव्ड हे। महिला मन जउन ये मास्क तियार करत हें तेला धोके फेर दुबारा-तिबारा उपयोग करे जा सकथे। एला धोए के बाद दुबारा-तिवारा उपयोग करे म कोनो समस्या नइ हे। मगरलोड क्षेत्र के सर्वोदय आजीविका स्व-सहायता समूह अऊ जय माता दीन स्व-सहायता समूह के 20 महिला मन सरलग ये काम म भिड़े हें।
बिहान योजना के सहायक परियोजना अधिकारी श्री जय वर्मा ह बताइस के महिला समूह मास्क बनाए के काम करत हे। स्वास्थ्य विभाग ले मिले कपड़ा कोरोना अऊ आन वायरस के संक्रमण ल कम करथे। ये मास्क जल्दीच शहर के अस्पताल मन म भेजे जाही। मास्क बनाए बर महिला मन ल विशेष ट्रेनिंग देहे गए हे। अइसनहे बालोद, बिलासपुर, कोरबा, मुंगेली संग आन जिला मन म घलोक महिला समूह मन ह अबड़ अकन मास्क बनाके मनखे मन ल रियायती दर म उपलब्ध कराए जात हे अऊ कोरोना के खिलाफ ये जंग म महत्वपूर्ण योगदान देहे जात हे।
