ये पईत गोबर के इको फ्रेंडली गुलाल ले रंगीन होही होली

• छत्तीसगढ़ म गोबर ले गुलाल के अभिनव परयोग
• मुख्यमंत्री श्री बघेल ह अंतर्राष्ट्रीय किसान मेला म करे रहिन गोमय गुलाल के लांचिंग
• वैज्ञानिक मन के मार्गदर्शन म समूह के महिला मन ह बनाइन एंटी बैक्टीरियल ’गोमय गुलाल’

रायपुर, फूल ले बने हर्बल गुलाल ले होली सब मन खेले होहीं, फेर छत्तीसगढ़ म ये पईत गोबर के बने गुलाल ले होली रंगीन होही। देश म गोबर ले गुलाल बनाए के ये अभिनव परयोग पहली पईत होवत हे। प्रदेश के दक्षिण बस्तर दंतेवाड़ा जिला के सांई बाबा स्व सहायता समूह के महिला मन कृषि विज्ञान केंद्र के वैज्ञानिक मन के मार्गदर्शन म गोबर ले गुलाल तियार करत हें। एखर ले पहिली महिला मन ह फूल, सब्जि मन ले गुलाल तियार करे रहिन। प्रदेश म मुख्यमंत्री श्री भूपेश बघेल ह गोधन के माध्यम ले आर्थिक समृद्धि के जउन रद्दा बताए हें तेकर ले प्रेरित होके महिला मन ह गोबर ले हर्बल गुलाल तियार करत हें, जेन ल ’गोमय हर्बल गुलाल’ के नाम देहे गए हे। मुख्यमंत्री श्री भूपेश बघेल ह इंदिरा गांधी कृषि विश्वविद्यालय, रायपुर के परिसर म आयोजित अंतर्राष्ट्रीय किसान मेला म 12 मार्च के गोमय गुलाल लांच करे रहिन।
गोमय गुलाल ल छतीसगढ़ के अलग-अलग जिला मन म बिक्री बर भेजे जात हे। एनएमडीसी बैलाडीला, बचेली, कलेक्‍ट्रेड परिसर दंतेवाड़ा, रायपुर के इंदिरा गांधी कृषि विश्वविद्यालय म लगे स्टॉल म घलोक एला बेचे जात हे एखर संगेच एखर खरीदी ऑनलाइन घलोक करे जा सकत हे।
कृषि विज्ञान केन्द्र के वरिष्ठ वैज्ञानिक डॉ. नारायण साहू के बताती गोमय हर्बल गुलाल प्रसंस्कृत गोमय (गोबर), प्रसंस्कृत वर्मी कम्पोस्ट अऊ हल्दी, चंदन, चुकन्दर, कत्था, अरारोट, अपराजिता, सिंदूरी, मेंहदी अऊ प्राकृतिक पदार्थ मन के हस्त निर्मित रंग संयोजन ये। ये औषधीय गुण ले भरपूर हे। ये एंटी रेडिएशन, एंटी बैक्टेरियल गुण सहित हे। ये सुगंधित हे अऊ त्वचा ल ठंडकता प्रदान करइया हे। ये ह बाल अऊ त्वचा के धुलाई, सफाई करे हे।
ये गुलाल पूरा इकोफ्रेंडली अऊ हयूमन फ्रेंडली हे। ये महिला मन के आय सृजन बर कम लागत म तियार करे गए हे जेन गोठान मन के शुद्ध गोबर ले बनाए गए हे। सांई बाबा स्वसहायता समूह म 20 महिला जुड़े हें। कृषि विज्ञान केन्द्र ले जुड़के कई तरीका ले गुलाल बनाए के संग गोबर ले गुलाल बनाके समूह के दीदी मन काफी उत्साहित हें। समूह के शांति कश्यप, पूजा बघेल संग आन महिला मन ह बताइन कि गोबर ले गुलाल बनाए के जब बात आईस त हमन घलोक उत्साहित होके काम करेन। डॉ नारायण साहू ह बताइस कि एखर से महिला मन ल बने आमदानी होवत हे।