रायपुर, 16 मई 2021। छत्तीसगढ़ के राज्यपाल सुश्री अनुसुईया उइके ह आज आदिवासी सेवा मंडल भोपाल कोति ले कोरोना ले बचाव अउर उपचार के संबंध म आयोजित वर्चुअल कार्यशाला ल सम्बोधित करत कहिन के आदिवासी समाज स्वाभिमानी होथे। वो खुद बढ़के कोनो चीज के मांग नइ करय, फेर ये समय ल देखत, समाज के पढ़े-लिखे अऊ सक्षम मनखे मन आगू आके अपन योगदान देवव, उंखर मदद करव। उंखर मदद करे के इही सही समय हे। राज्यपाल सुश्री अनुसुईया उइके ह कहिन के कोरोना ह जइसन हालत पैदा करे हे वइसन कोनो कल्पना घलोक नइ करे रहिन। केंद्र सरकार अउर राज्य सरकार कोरोना ले लड़े बर हर संभव प्रयास करत हे। कई प्रकार के योजना, पैकेज, टीकाकरण आदि के काम तेजी ले करे जात हे, फेर वनांचल क्षेत्र म रहइया आदिवासी समाज के मनखे जिंकर पास टीवी, रेडियो या समाचार पत्र के साधन नइ हे, उंखर मन तक शासन के योजना मन के जानकारी नइ पहुंच पापय। अइसन म समाज के शिक्षित अऊ सक्षम वर्ग के जिम्मेदारी बाढ़ जाथे के ओ मन ल जागरूक करव। आखिरी मनखे तक शासन के योजनाएं पहुंचाए म मदद करव।
आदिवासी समाज ल कोविड 19 बर जागरूक करे, समाज के पढ़े-लिखे अऊ सक्षम मनखे मन आगू आवव: राज्यपाल सुश्री अनुसुईया उइके
