मुख्यमंत्री ह करिस सेंट जेवियर स्कूल भवन के उद्घाटन
रायपुर, 26 जनवरी 2020। मुख्यमंत्री श्री भूपेश बघेल ह कहिन हे कि बस्तर अंचल म शिक्षा के क्षेत्र म बहुत काम करे के जरूरत हे। उमन कहिन कि राज्य सरकार कोति ले ये दिशा म प्रयास करे जात हे। अब निजी क्षेत्र घलोक बस्तर म शिक्षा के क्षेत्र म आगू आवत हे। एखर से बस्तर म शिक्षा के प्रति बेहतर वातावरण बनही अऊ एक दिन शिक्षा के क्षेत्र म घलोक बस्तर के नाम रौशन होही। मुख्यमंत्री श्री बघेल इतवार 26 जनवरी के कुम्हरावण्ड म सेंट जेवियर स्कूल भवन के उद्घाटन समारोह ल सम्बोधित करत रहिन। विधायक जगदलपुर श्री रेखचंद जैन, विधायक चित्रकोट श्री राजमन बेंजाम, महापौर श्रीमती शफीरा साहू अऊ सेंट जेवियर स्कूल के चेयरमेन श्री जी.एस. पटनायक ये बेरा म विशेष रूप उपस्थित रहिन।
