मुख्यमंत्री ह ‘मोर गांव मोर पानी’ अभियान म आधारित पुस्तिका के करिन विमोचन
रायपुर, मुख्यमंत्री श्री विष्णु देव साय ह आज विधानसभा परिसर स्थित अपन कक्ष म ‘मोर गांव मोर पानी’ महाअभियान उपर आधारित पुस्तिका के विमोचन करिन। ए बेरा म उमन कहिन के पंचायती राज दिवस के अवसर म चालू करे गए ए विशेष अभियान ह जल संरक्षण अऊ संवर्धन के क्षेत्र म अभूतपूर्व चेतना उत्पन्न करे हे। विमोचन कार्यक्रम म उप मुख्यमंत्री श्री विजय शर्मा, प्रमुख सचिव पंचायत श्रीमती निहारिका बारीक, आयुक्त मनरेगा अऊ संचालक प्रधानमंत्री आवास योजना श्री तारण प्रकाश सिन्हा संग बहुत अकन अधिकारी उपस्थित रहिन।
मुख्यमंत्री श्री साय ह कहिन कि ग्राम पंचायत मन के सक्रियता अऊ जनता के स्वप्रेरित भागीदारी के चलत ये अभियान अब एक जनआंदोलन के रूप ले चुके हे। मनखे स्वेच्छा ले जल संरक्षण जइसे पुनीत काम मन ले जुड़त हें, जेन सकारात्मक सामाजिक बदलाव के स्पष्ट संकेत हे। उमन कहिन के पुस्तिका म राज्य के कई ठन पंचायत मन कोति ले जल संरक्षण के क्षेत्र म करे गए उल्लेखनीय काम अऊ नवाचार मन ल संकलित करे गए हे, जेन आन पंचायत मन के बर प्रेरणास्रोत बनही।
मुख्यमंत्री श्री साय ह कहिन कि अभियान के अंतर्गत सूचना, शिक्षा अऊ संचार (IEC) गतिविधि मन के माध्यम ले जल संरक्षण के प्रति जनजागरूकता बढ़ाय म विशेष ध्यान देहे गए हे। प्रदेश के 11,000 ले जादा ग्राम पंचायत भवन मन के भिथिया मन म भूजल स्तर अंकित करे गए हे, जेखर से मनखे मन म जल के महत्व ल लेके व्यावहारिक चेतना जागृत होए हे। उमन कहिन के ग्राम पंचायत मन के भूमिका जल संरक्षण ल जन-भागीदारी ले जोड़े म महत्वपूर्ण रहे हे, अऊ ये चेतना अवइया समय म अऊ जादा व्यापक स्वरूप लेही।
जानबा हे के ‘मोर गांव मोर पानी’ अभियान के तहत रैली, दीवार लेखन जइसे माध्यम मन ले व्यापक स्तर म जनसामान्य ल जल संरक्षण के प्रति संवेदनशील अऊ जागरूक करे गए हे। 626 क्लस्टर्स म आयोजित प्रशिक्षण मन के माध्यम ले 56,000 ले जादा प्रतिभागी मन ल जल प्रबंधन अऊ संरक्षण बर तैयार करे गए हे।
ये अभियान म GIS तकनीक के उपयोग करके जल संरक्षण काम मन के प्रभावी योजना बनाय जात हे, जबकि जलदूत ऐप के माध्यम ले खुला कुआं मन के जल स्तर नापे जात हे। एखर ले अकतहा, परकोलेशन टैंक, अर्दन डैम, डिफंक्ट बोरवेल रिचार्ज स्ट्रक्चर जइसे संरचनात्मक उपाय मन के माध्यम ले जल पुनर्भरण अऊ संरक्षण के स्थायी प्रयास करे जात हे। ग्राम पंचायत मन के ये उदीम छत्तीसगढ़ ल जल संरक्षण के राष्ट्रीय मॉडल के रूप म स्थापित करही।
ग्राम पंचायत मन के सक्रियता अऊ स्वप्रेरित जनभागीदारी ले होवत हे जल संरक्षण के सुग्घर उदीम: मुख्यमंत्री श्री विष्णु देव साय
