खाली सीट म भर्ती बर होही चयन परीक्षा
मुंगेली 29 अप्रैल 2020// जिला के विकास खण्ड लोरमी के गांव बंधवा म संचालित एकलव्य आदर्श आवासीय विद्यालय म कक्षा 9वीं म भर्ती चयन परीक्षा 27 मई के बिहनिया 11 बजे ले मंझनिया 2 बजे तक रखे जही।जेखर बर आवेदन पत्र 15 मई तक गांव बंधवा स्थित एकलव्य आदर्श आवासीय विद्यालय ले प्राप्त करे जा सकत हे। कक्षा 9वीं म रिक्त अनुसूचित जन जाति वर्ग के पांच बाबू लइका अउ एक नोनी लइका के भर्ती बर चयन परीक्षा आयोजित करे जहि। चयन परीक्षा खातिर गांव बंधवा स्थित एकलव्य आदर्श आवासीय विद्यालय ल परीक्षा केंद्र बनाय गे हे।
आदिवासी विकास विभाग के सहायक आयुक्त ह आज इहां बताइन कि एकलव्य आदर्श आवासीय विद्यालय म भर्ती बर पड़ैया लइका ल जिला म स्थित शासकीय या शासकीय मान्यता प्राप्त विद्यालय ले कक्षा 8वीं पास होना चाहि । ऊंखर उमर 1 मई के 13 से 16 वछर के बिच म होना चाहि। परीक्षा ह अंग्रेजी अउ हिन्दी माध्यम म होही। लइका ल कक्षा 8वीं म 80 प्रतिशत ए ग्रेड प्राप्त होना चाही । चयन परीक्षा 100 नम्बर के होही। अंग्रेजी अउ हिन्दी 15-15 नम्बर के अउ गणित,विज्ञान 35-35 नम्बर के होही। प्रश्न पत्र वस्तुनिष्ठ अउ विवरणात्मक हो सकत हे। भर्ती के समय लइका ल कक्षा 8वीं के अंक सूची, शाला स्थानांतरण प्रमाण पत्र छ.ग. के मूल निवास प्रमाण पत्र, अनुसूचित जन जाति के स्थायी जाति प्रमाण पत्र, आधार कार्ड के छायाप्रति अउ बैंक पासबुक के छायाप्रति लाना अनिवार्य होही ।जादा जानकारी लेहे बर कलेक्टरेट स्थित आदिवासी विकास विभाग के कार्यालय ले संपर्क करे जा सकत हे।
मुंगेली ले गुरतुर गोठ बर दिलीप बसंत
