स्कूल-स्कूल, गाँव-गाँव म चलाए जाही जागरण अभियान
रायपुर, छत्तीसगढ़ी राजभाषा दिवस के मौका म काली प्रदेश भर ले छत्तीसगढ़ी बर काम करईया मनखे मन रायपुर म जुरिए रहिन। रायपुर प्रेस क्लब म आयोजित राजभाषा दिवस समारोह म आयोजित गोष्ठी म सब मन मिलके ये तय करिन के प्राथमिक शिक्षा छत्तीसगढ़ी भाखा म होवय एखर खातिर स्कूल-स्कूल, गाँव-गाँव म जन-जागरण चलाए जाही। संगेच सरकार ले अपील घलोक करे गीस के छत्तीसगढ़ी माध्यम म शिक्षा देहे के जेन ऐलान सरकार ह करे रहिस ओला पूरा करय।
प्रेस क्लब म आयोजिक गोष्ठी म छत्तीसगढ़ी राजभाषा मंच के संरक्षक नंदकिशोर शुक्ल ह बताइस के कइसे राज्य निर्माण ले लेके अब तक 21 साल म छत्तीसगढ़ी के संग छल होए हे। राज्य के नौकरशाह मन ह सरकार ल गुमराह करे के काम करे हे। केन्द्र म छत्तीसगढ़ ल ‘ख’ वर्ग के भाषाई राज्य म सामिल ना कराके, हिन्दी भाषाई राज्य के रूप म सामिल करवाए के सेती छत्तीसगढ़ी बर आज घलोक हमला संघर्ष करे ल परत हे। सरकार ल तुरंते प्राथमिक शिक्षा छत्तीसगढ़ी म चालू कराना चाही।
छत्तीसगढ़िया महिला क्रांति सेना के अध्यक्ष लता राठौर ह कहिन कि सरकार ह घोषणा म अमल नइ करिस ते पाए के आज हनला कोर्ट म जाके लड़ाई लड़ना परत हे। अब न्यायलय ले अपन हक लेके रइबो। उहें पद्मश्री अनूप रंजन पाण्डेय ह कहिन के पूरा छत्तीसगढ़ के मनखे मन ल अपन मातृभाषा बर एकजुट होना परही। साहित्यकार संजीव तिवारी, वरिष्ठ पत्रकार राम अवतार तिवारी, पूर्व संस्कृति सलाहकार अशोक तिवारी, साहित्यकार डॉ. सुधीर शर्मा ह घलोक अपन विचार रखिन।
