- हाथी ले जान बचाय बर मनखे मन ल मिलत हे सुविधा
- जिला के आठ हाथी प्रभावित गांव मन म सोलर पावर प्लांट स्थापित
कोरबा 06 जुलाई 2021। जिला के हाथी प्रभावित दूरस्थ वनांचल क्षेत्र के गांव मन म सोलर लाईट ले अंजोर होवत हे। क्रेडा ह कटघोरा वनमंडल वाले विकासखण्ड पोड़ी-उपरोड़ा के आठ गांव मन म सोलर लाइट बर सोलर पावर प्लांट स्थापित करे गए हे। हाथी प्रभावित गांव लाद, बनिया, तनेरा, बाला, सलिहाभांठा, केंदई सड़कपारा, केंदई बस्ती अउर ठूठीपीपर म तीन किलोवॉट क्षमता के सोलर पावर प्लांट स्थापित करे गए हे। सोलर पावर प्लांट ले ए गांव मन म लगे सोलर स्ट्रीट लाईट मन ल बिजली देहे जात हे। ए गांव मन ल सोलर लाईट के सुविधा मिले ले गांव के सड़क, गली अउ चउंक-चउराहा मन म अंजोर होवत हे। अंजोर होए के सेती गांव मन म हाथी घुसरय नहीं जेखर से मनखे मन के जान-माल के खतरा ह दूर हो गए हे। हाथी प्रभावित गांव बनिया के सरपंच श्रीमती संतोषी के बताती वोखर गांव के गली मन म करीबन 20 पोल सोलर लाईट के लगाए गए हे। सोलर लाईट के लग जाय ले रात म अंजोर रहिथे। रात म अंजोर रहे ले गांव म हाथी के दल प्रवेश नइ करय। सरपंच ह बताइस के बारिश के मौसम म बिजली बंद होए के बाद घलो सोलर लाईट ले अंजोर होवत रहिथे। गांव म हाथी दल के प्रवेश करे के सूचना मिलतेच सबो मनखे सोलर लाईट तरी जाके अपन जान बचाथें। संतोषी के बताती गांव म सोलर लाईट लग जाय ले मनखे मन ल हाथी ले जान बचाय के संग फसल सुरक्षा के घलोक सुविधा मिलत हे।
अइसनहे ग्राम पंचायत लाद के सरपंच श्री हिमांशु तंवर ह बताइस के क्रेडा विभाग ह ऊंखर गांव के छिंदवारपारा मोहल्ला म सोलर पावर प्लांट लगाए हे। पावर प्लांट ले गली म लगे सोलर स्ट्रीट लाईट ले बिजली मिलत हे। सोलर लाईट के लगे ले रोशनी के समस्या दूर हो गए हे। सोलर लाईट दिनभर चार्ज होत रहिथे अऊ संझा होतेच चालू हो जाथे। ये लाईट रातभर बरथे। सरपंच ह बताइस के सोलर लाईट ले सबो मौसम म गांव के गली मन म अंजोर रहिथे। पहिली गांव म हाथी आए म हाथी ल भगवारे अऊ सुरक्षा बर आगी बार के रोशनी के व्यवस्था करना परत रहिस। बरसा के मौसम म आगी जलावत बनय नहीं। अइसे म बिजली गोल होए म पूरा गांव म अंधियार छा जाथे। अइसन समय म हाथी दल के आए म मनखे मन ल अंधियार म भागे के रद्दा नइ मिले म जान-माल के काफी नुकसान होवय। क्रेडा कोति ले सोलर लाईट लगाए ले अब सबो मौसम म रात कन अंजोर रहिथे अउ सबो मनखे मन सकला के जान बचाय म सफल हो जाथें।