हिंसक वन्यप्राणी मन से जनहानि, फसल हानि के प्रकरण मन के संवेदनशीलता ले करव निराकरण : मुख्यमंत्री श्री विष्णु देव साय

मुख्यमंत्री श्री साय ह वन अऊ जलवायु बदलाव विभाग के काम मन के समीक्षा करिन
रायपुर, मुख्यमंत्री श्री विष्णु देव साय ह स्पष्ट निर्देश देहे हें के हिंसक वन्यप्राणी मन से जनहानि, पशुहानि अऊ फसल क्षति के प्रकरण मन म जल्दी, नियमानुसार अऊ संवेदनशीलता ले क्षतिपूर्ति सहायता देहे जाय। वनांचल म निवासरत मनखे मन ल कई पइत वन्यप्राणी मन के हमला ले अपन मनखे के सरग सिधारे के पीरा सहे ल परथे। उमन कहिन के अइसन मामला मन म प्रभावित मन के दुख-दर्द के मानवीय दृष्टिकोण ले लउहे निराकरण करे जाना जरूरी हे।
मुख्यमंत्री श्री साय आज मंत्रालय महानदी भवन, नवा रायपुर म वन अऊ जलवायु बदलाव विभाग के समीक्षा बैठक ल संबोधित करत रहिन। उमन कहिन के हाथी-मानव द्वंद्व Elephant-Human Conflict अऊ आन हिंसक वन्यप्राणी मन से जनहानि, पशुहानि अऊ फसल क्षति के घटना राज्य के वनांचल क्षेत्र मन म चुनौती बनके उभरत हे। अइसन स्थिति मन म शासन के जिम्मेदारी हे के पीड़ित मन ल लउहे अऊ न्यायसंगत सहायता उपलब्ध कराए जाय। मुख्यमंत्री ह निर्देश दीन के सबो संबंधित प्रकरण मन के नियमानुसार जल्दी निराकरण ठउका करे जाए।
मुख्यमंत्री श्री साय ह कहिन के जंगली हाथी मन कोति ले धान जइसे प्रमुख फसल के अकतहा गन्ना, केला, पपीता अऊ कटहल जइसे नगदी फसल मन ल घलोक भारी नुकसान पहुंचाए जात हे, जेखर से किसान मन ल आर्थिक ही न ही, मानसिक रूप ले घलोक दुहरी मार झेलना परत हे। बैठक म मुख्यमंत्री ह प्रदेश म प्रदत्त व्यक्तिगत वनाधिकार पट्टा मन के अपडेट स्थिति के घलोक जानकारी लीन।
बैठक म वन अऊ जलवायु बदलाव मंत्री श्री केदार कश्यप ह अधिकारी मन ल निर्देशित करत कहिन के शासन कोति ले प्रदत्त सहायता समय म प्रभावित मन तक पहुंचय, एखर बर विभागीय समन्वय ल अऊ जादा मजबूत करे जाए। जनहानि, स्थायी अपंगता, पशुहानि, मकान क्षति अऊ फसल हानि बर देहे जाने वाले क्षतिपूर्ति दर म बढ़ोतरी करे के प्रस्ताव घलोक बैठक म प्रस्तुत करे गीस।
बैठक म प्राकृतिक आपदा मन ले होवइया फसल क्षति के आरबीसी के प्रावधान मन के अंतर्गत जेन सहायता राशि देहे जाथे वो बारे म घलोक चर्चा करे गीस।
बैठक मे मुख्य सचिव श्री अमिताभ जैन, अपर मुख्य सचिव (वन) श्रीमती ऋचा शर्मा, मुख्यमंत्री के प्रमुख सचिव श्री सुबोध कुमार सिंह, मुख्यमंत्री के सचिव श्री राहुल भगत, कृषि विभाग के सचिव श्रीमती शहला निगार, राजस्व अऊ आपदा प्रबंधन विभाग के सचिव श्री अविनाश चंपावत, योजना, आर्थिक अऊ सांख्यिकी सचिव श्री अंकित आनंद, सचिव (वन) श्री अमरनाथ प्रसाद, प्रधान मुख्य वन संरक्षक (वन्य प्राणी) श्री सुधीर अग्रवाल, अपर मुख्य वन संरक्षक श्री प्रेम कुमार संग आन वरिष्ठ अधिकारी उपस्थित रहिन।