हाथी के बच्चा के मउत, वन अधिकारी ह बाघ के हमला करे के जतइस आशंका

गरियाबंद, 18 अक्टूबर 2020। जिला म फिर एक हाथी के मउत होगे। वन अधिकारी ह मउका म पहुंच के शव के पोस्टमार्टम करवाइस। अधिकारी के कहना हे कि घटनास्थल के आसपास बाघ के पंजा के चीन्हा मिले हे। उहें हाथी के पैर अउ पिछु हिस्सा म बाघ के चाबे के चीन्हा घलो मिले हे। खास बात ये हे कि इही पहाड़ म पहली घलो एक छोटे हाथी के मउत हो चुके हे। ओढ़ आमामोरा के पहाड़ म पहुंचे 22 हाथी के दल म एक हाथी के मउत पहली धवलपुर के पारा गांव म करंट लगे ले हो चुके रिहिस। आज उही दल के एक हाथी के बच्चा के मउत होय हे। वन अधिकारी ह बतइस कि हाथी के बच्चा के उपर बाघ ह हमला करे के प्रयास करत रिहिस। जेखर बाद हाथी के बच्चा घायल होगे। कुछ समय घायल रेहे के बाद बीते रात मउत होगे। जानकारी ग्रामीण मन ल लगीस त ग्रामीण मन ह वन विभाग ल सूचना भेजीस जेखर बाद वन अधिकारी पशु चिकित्सक ल लेके पोस्टमार्टम कराय बर पहुचीस।