नई दिल्ली, केरल म एक हथिनी के संग हैवानियत के एक अजीबो गरीब घटना आगु आइस जब कुछ लोग मन ह ओला पटाखा ले भरे अनानास खिला दीस. पटाखा ओखर मुंह म फटगे अउ गर्भवती मादा हाथी के मउत होगे. शिकारी ये तरीका मन ल खास तौर ले जंगली सूअर मन ल पकड़े बर इस्तेमाल करथे. ये मामला वो बेरा आगु आइस, जब उत्तरी केरल के मलप्पुरम म एक फॉरेस्ट अफसर ह ये घटना के बारे अपन फेसबुक पेज म शेयर करिस.
फॉरेस्ट अफसर के शेयर करत ही ये पोस्ट वायरल होगे अउ पोस्ट वायरल होवत ही लोग मन मादा हाथी के तिर पहुंच के खाना के समान फेंकन लागिस ताकि ये तकलीफ म ओला कुछ आराम मिल सके.
रेस्क्यू टीम म शामिल मोहन कृष्णन ह अपन फेसबुक म लिखिन कि मादा हाथी खाना के तलाश म जंगल ले पास के गांव म पहुंचगे रहिस. इंहा-उंहा येति-वोती घूमत रहिस. ओखर बाद ओला कुछ लोग मन ह पटाखा ले भरे अनानास खिला दीस.
मोहन कृष्णन आगु लिखिस, पटाखा अतना असरदार रहिस, कि ओखर मुंह अउ जीभ बुरा तरह ले जख्मी होगे. वो खाना के तलाश म पूरा गांव म भटकत रहिस. दर्द के चलत वो कुछ खा घलो नई सकिस. मादा हाथी ह घायल होय के बाद घलो कोनो ल नुकसान नई पहुँचाइस, कोनो के उपर हमला घलो नई करिस. वो बहुत सीधवी अउ शांत रहिस.
कृष्णन ह आगु लिखिस, मादा हाथी खाना के खोज म वेल्लियार नदी तक पहुंचगे काबर कि ओखर पेट म बच्चा रहिस. वो पानी म खड़े होगे. पानी म मुंह डाले ले ओला थोड़ा आराम मिलिस.
जब हाथी के दयनीय स्थिति फॉरेस्ट अफसर मन ल पता चलिस, त वो दू हाथी मन के मदद ले, घायल हाथी ल वलियार नदी ले बाहर निकाले बर आइस. बड़ा मुश्किल के बाद पानी ले बाहर निकाले गिस, लेकिन ओखर मउत होगे.
