मुख्यमंत्री श्री बघेल ह छत्तीसगढ़ के प्रख्यात कानून विद् श्री सी.एन.झा के निधन म गहरा दुःख प्रकट करिन

रायपुर, मुख्यमंत्री श्री भूपेश बघेल ह छत्तीसगढ़ के प्रख्यात विधि विशेषज्ञ अऊ कानून विद् श्री सी.एन. झा के निधन म गहरा दुःख प्रकट करे हें। ओ मन अड़बड़ दिन ले अस्वस्थ चलत रहिन। उमन आज बिलासपुर के एक निजी अस्पताल म 91 साल के उमर म आखरी सांस लीन। मुख्यमंत्री श्री बघेल ह श्री सी.एन.झा के शोक संतप्त परिवारजन के प्रति संवेदना प्रकट करत दिवंगत आत्मा के शांति बर ईश्वर ले प्रार्थना करे हें।
श्री सी.एन.झा मूलतः कवर्धा के निवासी रहिन। उमन स्वर्गीय श्री लक्ष्मण प्रसाद तंबोली के संग मिलके ’म.प्र.आबकारी विधि संग्रह, मं.प्र. जरूरी चीज मैन्युअल अऊ हिन्दू विधि ’कानून के पुस्तक के लेखन करिन। श्री सी.एन. झा ल विधि के क्षेत्र म उत्कृष्ट योगदान बर तीन पईत राष्ट्रपति के हाथ ले सम्मानित करे गए रहिस। श्री झा ह वन विधि संग्रह, म.प्र.पालिका अधिनियम, कृषि उपज मण्डी अधिनियम, हिन्दू विधि डाइजेस्ट आन एम पी केसेज जइसे 97 विधि पुस्तक मन के लेखन करे रहिन। छत्तीसगढ़ गठन के बाद राज्य शासन कोति ले ओ मन ल विधि बर प्रतिष्ठित राज्य अलंकरण ’बैरिस्टर छेदीलाल पुरस्कार’ ले सम्मानित करे गीस। ओ मन ’छत्तीसगढ़ लॉ जजमेंट अऊ छत्तीसगढ़ रेवेन्यू जजमेंट पत्रिका’ के प्रधान संपादक रहिन। श्री झा कवर्धा अधिवक्ता संघ के 25 साल तक, भोरमदेव प्रबंध समिति के 22 साल तक अध्यक्ष रहिन। श्री झा कवर्धा जिला निर्माण बर गठित संघर्ष समिति के घलोक अध्यक्ष रहिन। उंखर अंतिम संस्कार कवर्धा के मुक्तिधाम म सनिच्‍चर 19 नवम्बर के करे जाही।