खेती किसानी ले जुड़े अपन अनुभव साझा करत उत्पादकता बढ़ाए खातिर दीन जरूरी निर्देश
वर्षा काल म पशुधन ल बीमारी मन ले बचाय बर व्यापक स्तर म टीकाकरण करे ल कहिन
गौवंश के संरक्षण अऊ संवर्धन बर सबो संभाग म बनही एक एक गौ अभ्यारण्य
देवभोग के दुग्ध उत्पाद के बिक्री बढ़ाए अच्छा ब्रांडिंग अऊ मार्केटिंग उपर जोर: आईआईएम अध्ययन करके देही सलाह
केज कल्चर, बॉयोफ्लाक जइसन नवाचार ले मछली पालन ल मिलही बढ़ावा
रायपुर, 13 जून 2024/ आचार सहिंता के बेरा खतम होए के बाद छत्तीसगढ़ के मुख्यमंत्री श्री विष्णु देव साय ह राज्य के विकास के गति तेज करे बर आज ले कई ठन विभाग मन के मैराथन समीक्षा बैठक लेना शुरू कर दीन। आज उमन कृषि ले संबंधित विभाग मन ले एखर शुरूआत करत अधिकरी मन ले उंखर तैयारी के संबंध म जानकारी लीन अऊ खेती किसानी ले जुड़े अपन के व्यवहारिक अनुभव ल घलोक साझा करिन। श्री साय खुदे किसान यें अऊ उंखर परिवार अपन आजीविका बर मुख्य रूप ले खेती किसानी उपर ही निर्भर रहे हे। मुख्यमंत्री ह कहिन कि अच्छा परिणाम बर पूरा पारदर्शिता अऊ तत्परता के संग काम करे जाना जरूरी हे।
मुख्यमंत्री ह अधिकारी मन ले कहिन कि हमला अइसन कदम उठाए जाय के जरूरत हे, जेन किसान मन ल उंखर उत्पादकता बढ़ाए बर प्रेरित करय। परंपरागत खेती म हर जरूरी सहायता उन तक तत्परता ले पहुंचाए के संगे-संग आधुनिक खेती अऊ देश भर म होवत नवाचार ले घलोक ओ मन ल अवगत कराए के जरूरत हे। राजधानी रायपुर स्थित अपन निवास कार्यालय म आयोजित समीक्षा बैठक म मुख्यमंत्री ह कहिन कि ये ठउका करे जाना जरूरी हे कि किसान, पशुपालक अऊ दुग्ध उत्पादक मन के आय म बढ़ोत्तरी होवय। अधिकारी मन ल अपन अनुभव बतात मुख्यमंत्री ह कहिन कि वर्षा काल म पशु मन ल होवइया बिमारी मन के रोकथाम बर मुस्तैदी के संग काम करे जाना जरूरी हे। श्री साय ह पशुधन विकास विभाग, छत्तीसगढ़ राज्य सहकारी दुग्ध महासंघ अऊ मछली पालन विभाग के काम मन के गहन समीक्षा करिन। उमन कहिन कि पशुपालन, मछली पालन अउ दुग्ध उत्पादन जइसे व्यवसाय किसान अऊ पशुपालक मन के आय के बड़का स्त्रोत हे, एखर से जुड़े योजना मन के प्रभावी क्रियान्वयन ले निश्चित रूप ले किसान मन के आय म बढ़ोत्तरी होही। मुख्यमंत्री श्री साय ह पशुधन विकास विभाग के समीक्षा के समय कहिन कि प्रदेश म गौवंश के रक्षा अऊ संवर्धन बर सबो संभाग के एक-एक जिला म गौ अभ्यारण्य के स्थापना करे जाही।
मुख्यमंत्री श्री विष्णु देव साय ह पशुधन विकास विभाग के अधिकारी मन ले प्रदेश म पशुधन के संख्या अऊ वार्षिक दुग्ध, अंडा अउ मांस उत्पादन अउ उपलब्धता के जानकारी लीन। मुख्यमंत्री ह हर साल हर मनखे अंडा, दुग्ध अऊ मांस के जरूरत ल पूरा करे बर उत्पादन बढ़ाए खातिर जरूरी कदम उठाए के निर्देश दीन। मुख्यमंत्री ह वर्षा काल म पशु मन ल संक्रामक बिमारी मन ले बचाय बर व्यापक स्तर म टीकाकरण करे के निर्देश दीन। उमन पशु मन के नस्ल सुधार बर चलाए जात योजना मन के प्रभावी क्रियान्वयन उपर घलोक बल दीन। संगेच पशुधन विभाग के राज्य अऊ केन्द्र के प्रवर्तित योजना मन के लाभ घलोक जादा ले जादा पशुपालक मन तक पहुंचाए ल कहिन। पशुधन विकास विभाग के अधिकारी मन ह विभाग के अवइया कार्ययोजना अऊ लक्ष्य मन के बारे म मुख्यमंत्री ल विस्तृत जानकारी दीन।
मुख्यमंत्री श्री विष्णु देव साय ह छत्तीसगढ़ राज्य सहकारी दुग्ध महासंघ के काम मन के समीक्षा करत कहिन कि दूध अऊ दुग्ध उत्पाद के बिक्री अउ दूध उत्पादन करइया किसान मन के आमदनी बढ़ाए बर समुचित उपाए करे जाए। उमन दुग्ध महासंघ के ब्रांड देवभोग के बिक्री अऊ आमदनी बढ़ाए बर आउटलेट के संख्या म वृद्धि अऊ आन विकल्प मन बर भारतीय प्रबंध संस्थान ले विस्तृत अध्ययन कराए के निर्देश दीन। उमन कहिन कि एखर बर बनेच मार्केटिंग अऊ ब्रांडिंग जइसे व्यवसायिक पद्धति मन के सहारा घलोक लेहे जाय। अधिकारी मन ह मुख्यमंत्री ल प्रोसेस फ्लो चार्ट के माध्यम ले दुग्ध संकलन ले लेके उपभोक्ता तक पहुंचे तक के पूरा प्रक्रिया के विस्तृत जानकारी दीन। एखर बाद मुख्यमंत्री ह मछलीपालन विभाग के अधिकारी मन के संग विभागीय काम अउ योजना मन के समीक्षा करिन। उमन कहिन कि मछली पालन ल बढ़ावा देहे बर योजना मन के व्यापक प्रचार-प्रसार करव अऊ ग्रामीण इलाका मन म किसान मन ल जानकारी अउ प्रशिक्षण देवव। श्री साय ह अपन अनुभव साझा करत बताइन के शासन के कई ठन योजना मन के माध्यम ले तालाब मन के निर्माण कराए जात हे अऊ गर्मि मन म तालाब सूखा के सती अनुपयोगी हो जात हे। अइसन किसान मन के चिन्हारी करके अइसन तालाब मन म पानी के आपूर्ति बर सोलर पंप के व्यवस्था करे जाय ताकि सबो मौसम म मछली पालन करे जा सकय। मुख्यमंत्री श्री साय ह मछली उत्पादन बर केज कल्चर जइसे बॉयोफ्लाक जइसे नवाचार के बढ़ावा देहे अऊ किसान मन ल प्रशिक्षित करे के निर्देश घलोक अधिकारी मन ल दीन।
समीक्षा बैठक म मुख्य सचिव श्री अमिताभ जैन, कृषि उत्पादन आयुक्त श्रीमती शहला निगार, मुख्यमंत्री के सचिव पी. दयानंद, डॉ. बसव राजु एस अऊ श्री राहुल भगत, संचालक पशु चिकित्सा सेवाएं डॉ. प्रियंका शुक्ला, संग संबंधित अधिकारी मौजूद रहिन।