सौर ऊर्जा ले हेमलता के घर जगमगाइस – बिजली बिल ले मिलीस आज़ादी

प्रधानमंत्री सूर्यघर-मुफ़्त बिजली योजना ले ऊर्जा आत्मनिर्भरता अऊ हरित ऊर्जा कोति बढि़स कदम
धमतरी, ऊर्जा संरक्षण अऊ आत्मनिर्भरता के दिशा म केंद्र अऊ राज्य सरकार कोति ले चलाए जात प्रधानमंत्री सूर्यघर-मुफ़्त बिजली योजना धमतरी ज़िला के नागरिक मन बर एक वरदान साबित होवत हे। ए योजना ह मनखे मन ल महंगा बिजली बिल ले राहत देवात हे, संगेच पर्यावरण संरक्षण म घलोक अहम योगदान देवत हे। धमतरी ज़िला म हेमलता जइसे कई महिला मन ए योजना के लाभ उठाके ऊर्जा आत्मनिर्भरता के दिशा म आगू बढ़त हें। प्रधानमंत्री सूर्यघर-मुफ़्त बिजली योजना ये साबित करत हे के सही क्रियान्वयन अऊ जनभागीदारी ले बदलाव संभव हे। दानिटोला वार्ड के रहवइया श्रीमती हेमलता साहू एखर जीवंत मिसाल हे।
श्रीमती साहू ह ए योजना के लाभ उठाके अपन घर के छत म 3 किलोवाट क्षमता के रूफटॉप सोलर पैनल संयंत्र स्थापित करे हे। लगभग 2 लाख रूपिया के लागत वाले ए संयंत्र बर ओ ल केंद्र सरकार ले 78 हज़ार रूपिया अऊ राज्य सरकार ले 30 हज़ार रूपिया के सब्सिडी मिले हे, जेखर से ओखर प्रारंभिक निवेश अड़बड़ कम हो गए हे।
हेमलता के बताती सोलर पैनल लगाय के पहिली ओखर महिना के बिजली बिल 1500 रुपिया ले 2 हज़ार रुपिया तक आवत रहिस, फेर अब ओखर बिल पूरा शून्य हो गए हे। अतकेच न ही, संयंत्र ले उत्पन्न अकतहा बिजली नेट मीटरिंग के माध्यम ले ग्रिड म भेजे जात हे, जेखर से ओ ल अकतहा आय के संभावना घलोक बने हे।
वो ह ये घलोक बताइस के योजना के अंतर्गत 7 प्रतिशत ब्याज दर म बैंक ले करजा आसानी ले उपलब्ध हो जाथे, जेखर से आम उपभोक्ता घलोक बिना वित्तीय बोझ के सोलर संयंत्र लगा सकत हे। ए योजना के तहत उपभोक्ता अपन छत म सोलर संयंत्र लगाके अकतहा बिजली ग्रिड म आपूर्ति कर सकत हे। संयंत्र के क्षमता के मुताबिक 30 हज़ार रुपिया ले 78 हज़ार रुपिया तक के सब्सिडी देहे जाथे। पंजीयन प्रक्रिया ऑनलाइन या मोबाइल एप ले करे जा सकत हे। उहें पंजीकृत वेंडर के चयन करे जा सकत हे। संयंत्र के स्थापना अऊ सत्यापन के बाद सब्सिडी सीधा उपभोक्ता के बैंक खाता म जमा हो जाथे।
ये पहल घर मन ल ऊर्जा के क्षेत्र म आत्मनिर्भर बनावत हे, संगेच कार्बन उत्सर्जन कम करे अऊ हरित ऊर्जा ल बढ़ावा देहे म घलोक महत्वपूर्ण भूमिका निभावत हे। सौर ऊर्जा के माध्यम ले बिजली उत्पादन, जीवाश्म ईंधन मन म निर्भरता घटाके पर्यावरण प्रदूषण म कमी लाथे।
प्रधानमंत्री श्री नरेंद्र मोदी अऊ मुख्यमंत्री श्री विष्णु देव साय के प्रति आभार व्यक्त करत श्रीमती हेमलता ह कहिस के सौर ऊर्जा ले हमर जेब ले बिजली खर्च के बोझा खतम होइस, संगेच हम स्वच्छ अऊ हरित ऊर्जा ले भविष्य के निर्माण म घलोक योगदान देवत हन।