रायपुर, मुख्यमंत्री श्री विष्णु देव साय ह पीएम सुरुज घर मुफ्त बिजली योजना के लाभ हितग्राही मन ल देहे के निर्देश देहे हें। योजना के तहत प्रधानमंत्री सुरुज घर मुफ्त बिजली योजना अब आम नागरिक मन के जीवन म ऊर्जा आत्मनिर्भरता के नवा मिसाल बनके उभरत हे। केंद्र अऊ राज्य सरकार के संघरा उदीम ले संचालित ये योजना आम उपभोक्ता मन के बिजली उपर निर्भरता घटावत हे, संगेच हर घर म हरित ऊर्जा के संचार करत हे। राज्य सरकार के अकतहा सब्सिडी ह सोलर पैनल लगवाना अऊ किफायती बना देहे हे।
बिजली बिल होइस शून्य
ये योजना ले प्रेरित होके पत्थलगांव के रहवइया श्री सुभाष मिंज, जेन एलआईसी म नौकरी करत रहिन अऊ कुछ साल पहिली सेवानिवृत्त होए हे, ह अपन मकान के छत म 3 केवी क्षमता वाले सोलर रूफटॉप सिसटम स्थापित करवाए हे। उमन बताइन के ए सिसटम ल लगाय म कुल लगभग 2 लाख रूपिया के लागत आए हे, जेमां ले ओ ल केंद्र सरकार ले 78 हजार रूपिया के सब्सिडी सीधा बैंक खाता म मिल गे, जेखर से आर्थिक बोझ म बड़ राहत मिलीस।
पर्यावरण खातिर फायदेमंद सौर ऊर्जा
श्री मिंज बताइस के सोलर सिसटम लगे ले पहिली ओखर मासिक बिजली बिल 700 ले 800 रूपिया के बीच आवत रहिस, जबकि अब ओखर बिल लगभग शून्य हो गए हे। वो ह बताइस के “जून ले सोलर पैनल चालू होय हे, तब ले बिजली बिल नइ आत हे। सुरुज के किरण ले उत्पन्न बिजली पर्यावरण खातिर फायदेमंद हे, संगेच एखर से हमर बचत घलोक सरलग बाढ़त हे।”
प्रधानमंत्री सुरुज घर मुफ्त बिजली योजना ह श्री मिंज जइसे नागरिक मन ल बिजली उपभोक्ता ले उत्पादक बने के दिशा म अग्रसर करे हे। ये पहल छत्तीसगढ़ म ऊर्जा आत्मनिर्भरता अऊ पर्यावरण संरक्षण के दिशा म मील के पत्थर साबित होवत हे।