किसान मन ल खाद-बीज बर कोनो दिक्कत नइ होना चाही
सोसायटी मन ले किसान मन ल खाद-बीज के सरलग वितरण जारी
खाद-बीज के भंडारण अऊ वितरण म लापरवाही बरतइया मन उपर होही कड़ी कार्यवाही
डी.ए.पी. खाद के मांग अऊ सप्लाई म रखव विशेष निगरानी
रायपुर, 03 जून 2024। मुख्यमंत्री श्री विष्णु देव साय ह अवइया खरीफ सीजन ल धियान म रखत सोसायटी मन म भरपूर मात्रा म खाद बीज के उपलब्धता सुनिश्चित करे के निर्देश देहे हें। मुख्यमंत्री ह कृषि अउ सहकारिता विभाग के अधिकारी मन ल मानक स्तर के खाद-बीज के भंडारण अउ उठाव के स्थिति म सरलग निगरानी रखे ल कहे हें। उमन अवइया 15 जून तक किसान मन ल उंखर डिमांड के आधार म गुणवत्तापूर्ण खाद-बीज देहे के व्यवस्था सोसायटी मन के माध्यम ले करे ल कहे हें। मुख्यमंत्री ह कहिन हे कि किसान मन ल खाद-बीज बर कोनो प्रकार के दिक्कत के सामना झन करना परय, ए संबंध म पहिली ले ही भरपूर व्यवस्था होना चाही। उमन सोसायटी मन म खाद-बीज के भंडारण अऊ वितरण म लापरवाही बरतइया के विरूद्ध कड़ा कार्यवाही के घलोक निर्देश देहे हें।
मुख्यमंत्री श्री विष्णु देव साय ह अपन खेती-किसानी के लम्बा अनुभव के आधार म कहे हें कि खरीफ सीजन म किसान भाई मन ह डी.ए.पी. खाद के मांग जादा करथें। एला ध्यान म रखत डी.ए.पी. खाद के मांग अऊ सप्लाई म विशेष निगरानी रखे ल कहे हें। उमन खाद-बीज के गुणवत्ता ल लेके घलोक सेंम्पलिंग अउ प्रयोगशाला के माध्यम ले जांच के विशेष अभियान संचालित करे ल कहे हें। उमन कृषि विभाग के अधिकारी मन ल अपन-अपन इलाका म खाद-बीज के मांग, भंडारण, उठाव अउ गुणवत्ता के मानिटरिंग के निर्देश देहे हें।
