रायपुर, 19 मार्च 2020। कोरोना वायरस के संक्रमण ल धियान म रखत मंत्रालय (महानदी भवन), नवा रायपुर अटल नगर म अवइया 31 मार्च तक बाहरी मनखे के प्रवेश पूर्णतः प्रतिबंधित करे हे। सामान्य प्रशासन विभाग के सचिव श्री डी.डी. सिंह ह आज सबो अपर मुख्य सचिव, प्रमुख सचिव, सचिव अऊ विशेष सचिव अऊ मंत्रालय के मुख्य सुरक्षा अधिकारी ल पत्र भेज के ये काम ल सर्वोच्च प्राथमिकता देहे के आग्रह करे हें। उमन वायरस के रोकथाम बर जम्मो विभाग मन ले ये घलोक आग्रह करे हें के ओ समय म मंत्रालय (महानदी भवन) म कोनो प्रकार के बैठक आयोजित ना करे जाय, काबर के आम तौर म बैठक मन म बाहरी मनखे घलोक उपस्थित होथे।
सामान्य प्रशासन विभाग के सचिव ह चिट्ठी म लिखे हें के मंत्रीगण, अपर मुख्य सचिव, प्रमुख सचिव अऊ सचिव के कार्यालय मन ले मंत्रालय प्रवेश बर प्रवेश पत्र जारी करे जाय म घलोक ये अवधि तक प्रवेश म प्रतिबंध लगाए जात हे। सामान्य प्रशासन विभाग के सचिव ह सबो मंत्रीगण, अपर मुख्य सचिव, प्रमुख सचिव, सचिव मन के निज सचिव, निज सहायक ले आग्रह करे हें के अत्यावश्यक प्रकरण मन म ही बाहरी मनखे ल प्रवेश बर प्रवेश पत्र जारी करे जाए। पत्र म कहे गए हे कि राज्य शासन कोति ले पहिली नोवेल कोरोना वायरस (कोविड-19) के संक्रमण के रोकथाम अउ नियंत्रण के संबंध म दिशा-निर्देश जारी करे गए हे। प्रदेश म कोरोना वायरस के संक्रमण ल ध्यान रखत मंत्रालय म घलोक सावधानी बरतना बहुत जरूरी हो गए हे।