प्रदेशवासी मन ले अपन घर म या आसपास एक पौधा लगाय अऊ ओला जीवित रखे के जिम्मेदारी लेहे के अपील करिन
पेड़ यदि वाई-फाई देतिस त ना जाने कतका पेड़ लग जातिस, पेड़ हमला जीवनदायनी ऑक्सिजन देथे
रायपुर, 05 जून 2020/ मुख्यमंत्री श्री भूपेश बघेल ह आज विश्व पर्यावरण दिवस के अवसर म राजधानी रायपुर स्थित अपन निवास परिसर म अमरूद, आम अऊ बोहार (लसोड़) केे पौधे लगाइन। श्री बघेल ह ए अवसर म प्रदेशवासी मन ले अपील करत कहिन के आप सबो। मन अपन घर म या आसपास एक पौधा अवश्य लगावव अऊ वोला जीवित रखे के जिम्मेदारी लेवव। चाहे वो फलदार वृक्ष के पौधा हो, चाहे इमारती लकड़ी के या फूल के हो। एखर से हमार आसपास के वातावरण अच्छा होही, शुद्ध ऑक्सीजन हमला मिलही अऊ जादा ले जादा हरियाली होही।
श्री बघेल ह कहिन के छत्तीसगढ़ काफी भाग्यशाली हे के इहां 44 प्रतिशत क्षेत्र म जंगल हे। हमार पुरखा मन ह ए जंगल मन ल सहेज के रखिन। एखर महत्व ल हमार पूर्वज बेहतर समझत रहिन। हमर पहिचान, हमर संस्कृति अऊ हमर जनजीवन एखर से जुडे हे, कहूँ पेड़-पौधा नइ होतिस, त तापमान कतका बाढ़ जातिस। प्रकृति के संतुलन बिगड़त हे अऊ एखर से बड़े भारी नुकसान के सामना हमला करना परत हे। मुख्यमंत्री ह कहिन के कहूँ पेड़ वाईफाई देतिस, त पता नइ कतका पेड़ लग जातिस, फेर ये केवल ऑक्सीजन देथे। ऑक्सीजन हमार जीवन बर बहुत महत्वपूर्ण हे। आज पूरा देश म कोरोना संक्रमण फैले हे अऊ केवल देश म ही नहीं पूरा विश्व म, अइसन समय म शुद्ध वातावरण के कतका महत्व हे ये हर मनखे समझत हे। छत्तीसगढ़ ए मामला म भाग्यशाली हे कि इहां 44 जंगल हे, जऊन ल हम सब मन बचा के रखे हन अऊ एला आगू बढ़ाए के जिम्मेदारी घलोक हम सब के हे। पर्यावरण दिवस के अवसर म में सबो ले आग्रह करना चाहत हंव के एक पेड़ जरूर लगावव अऊ ओला जीवित रखे के जिम्मेदारी खुद लेवव ताकि पेड़-पौधा बाढ़े, हरियाली होवय, चाहे वो पौधा फलदार हो, चाहे इमारती लकड़ी के हो, चाहे फूल के पौधा हो, जेखर से हमार आसपास म वातावरण अच्छा होवे, शुद्ध ऑक्सीजन हमला मिल सकय अऊ जादा ले जादा हरियाली रहय।
