बिजली बिल ले मिलीस राहत अऊ अवइया पीढ़ी बर स्वच्छ भविष्य के संकल्प
कोरबा, पर्यावरण संरक्षण अऊ ऊर्जा आत्मनिर्भरता के दिशा म भारत सरकार कोति ले चलाए जात महत्वाकांक्षी प्रधानमंत्री सूर्यघर मुफ्त बिजली योजना के लाभ अब कोरबा जिला के हर मोहल्ले अऊ बस्ती तक पहुँचत हे। ए योजना ह न केवल मनखे मन के बिजली बिल म भारी बचत कराए हे, बल्कि स्वच्छ ऊर्जा के माध्यम ले पर्यावरण के संरक्षण म घलोक अहम योगदान देहे हे। कोरबा जिला के नगरीय क्षेत्र हाउसिंग बोर्ड कॉलोनी, दादर खुर्द के रहवइया शंकर पुरी जे ह अपन घर के छत म सौर ऊर्जा के ’सूर्यघर’ स्थापित करके जीवन म नवा ऊर्जा भर देहे हे।
3 किलोवाट क्षमता के सोलर रूफटॉप, एक लाख रूपिया ले जादा के सब्सिडी
शंकर पुरी, जेन अपन परिवार के संग हाउसिंग बोर्ड कॉलोनी म रहिथे, हमेशा ले बिजली बिल के खरचा अऊ बिजली गोल होए के समस्या ले चिंतित रहिस। प्रधानमंत्री सूर्यघर योजना के बारे म जब वोला जानकारी मिलिस त वो ह बिना देर करे योजना के लाभ उठाए के निर्णय लीस। योजना के तहत वो ह अपन घर के छत म 3 किलोवाट क्षमता के सोलर रूफटॉप पैनल स्थापित करादस। ए योजना के सबले बड़का विशेषता ये हे के लाभार्थि मन ल केंद्र सरकार कोति ले सीधा अनुदान (सब्सिडी) देहे जात हे, जेखर से प्रारंभिक निवेश के बोझ काफी कम हो जात हे। शंकर पुरी ल घलोक ए योजना के अंतर्गत रूपिया 78 हजार के सब्सिडी सीधा वोखर बैंक खाता म प्राप्त हो गए। एखर से ओ ल सोलर पैनल स्थापना के कुल खर्च के बड़का हिस्सा कवर करे म मदद मिलीस। राज्य सरकार कोति ले घलोक शंकर पुरी ल 30 हजार रूपिया के अनुदान जल्दीच दे जाही।
पर्यावरण अनुकूल, 3.5 टन कार्बन उत्सर्जन म कमी
सोलर पैनल लगे के बाद ले पुरी ल हर महीना बिजली बिल म बचत होवत हे। ओखर कहना हे के ये बचत साल भर म एक बड़का राशि बन जाथे, जेन ल ओ परिवार के आन जरूरत अऊ लइका मन उपर खाचा करत हे। संगेच, ये प्रणाली पर्यावरण बर घलोक लाभकारी हे। सौर ऊर्जा के उपयोग ले सालाना लगभग 3.5 टन कार्बन उत्सर्जन म कमी आथे, जेन वातावरण ल स्वच्छ अऊ प्रदूषणमुक्त बनाए के दिशा म एक अहम कदम हे।
