प्रदेश के पहिली एथेनॉल प्लांट कोण्डागांव के कोकोड़ी म लेवत हे आकार

कोण्डागांव, प्रदेश के मुख्यमंत्री श्री भूपेश बघेल के मंशा के मुताबिक कोण्डागांव जिला के कोकोड़ी म मक्का प्रसंस्करण उपर आधारित राज्य के पहिली एथेनाल प्लांट अब अकार लेवत हे। मक्का प्रसंस्करण प्लांट जून 2023 तक पूरा करे के लक्ष्य निरधारित करे गए हे।
मक्का प्रसंस्करण प्लांट जिला के मक्का उत्पादक किसान मन के आर्थिक समृद्धि के दुवार खोलही। एखर से करीब 45 हजार ले जादा किसान सीधा लाभान्वित होही। एखर संगेच तीर के आन जिला के मक्का उत्पादक किसान मन के मक्का के प्रसंस्करण करे जाही। संगे मक्का प्रसंस्करण प्लांट म क्षेत्र के करीबन 200 ले जादा मनखे मन ल सीधा रोजगार मिलही। छत्तीसगढ़ सरकार के उद्योग नीति म कृषि अऊ वनोपज आधारित उद्योग मन के स्थापना ल विशेष प्राथमिकता श्रेणी म रखे गए हे।
कोण्डागांव जिला म 140 करोड़ रूपिया लागत ले बनत मक्का प्रोसेसिंग प्लांट किसान मन के जीवन संवारही। राज्य सरकार के सहयोग ले सहकारिता के क्षेत्र म ये पहिली प्लांट स्थापित करे जात हे। छत्तीसगढ़ राज्य म कोण्डागांव जिला म मक्का के सबले जादा उत्पादन होथे। ये प्लांट के स्थापना ले किसान मन ल मक्का के अधिक मूल्य मिले के उम्मीद हे। प्रोसेसिंग प्लांट के निर्माण के काम करीबन 35 प्रतिशत हो गए हे। ये प्लांट कोण्डागांव म ही नहीं भलुक छत्तीसगढ़ के किसान मन बर फायदेमंद साबित होही।
ग्राम कोकोड़ी म तियार होवत मक्का प्रोसेसिंग प्लांट के संचालन माँ दंतेश्वरी मक्का प्रसंस्करण अउ विपणन सहकारी समिति ह करही। ये प्लांट ग्राम कोकोड़ी म 14 एकड़ शासकीय जमीन म बनत हे। ये प्लांट म मक्का के आपूर्ति बर करीबन 45 हजार किसान मन के पंजीयन करे गए हे। प्लांट म रोजेच 200 मीट्रिक टन मक्का के प्रोसेसिंग होही, जेखर से 80 हजार लीटर एथेनॉल तियार होही। ये प्लांट के लग जाय ले निजी निवेशक मन आन सहायक उद्योग लगाय बर नवा वातावरण बनही।