- उप तहसील नांदघाट ल तहसील के दर्जा
- भिम्भोरी ल उप तहसील बनाए के घोषणा
- मुख्यमंत्री ह बेमेतरा जिलेवासी मन ल दीन 98.50 करोड़ के विकास कार्य के सौगात
- मुख्यमंत्री ह केन्द्र ले छत्तीसगढ़ के चावल लेहे के पुरजोर मांग करिन
रायपुर, मुख्यमंत्री श्री भूपेश बघेल ह आज जिला मुख्यालय बेमेतरा के ऐतिहासिक बेसिक स्कूल मैदान म आयोजित कार्यक्रम के समय 98 करोड़ 50 लाख रूपिया के विकास कार्य मन के लोकार्पण अऊ भूमिपूजन करिन। एखर अलावा उमन हितग्राही मूलक योजना मन के अंतर्गत हितग्राही मन ल सामाग्री के वितरण करिन। मुख्यमंत्री ह बेमेतरा जिला म इथेनॉल प्लांट स्थापित करे, उप तहसील नांदघाट ल तहसील के दर्जा, अऊ भिंभौरी ल उप तहसील बनाए जाय के घोषणा करिन। कार्यक्रम के अध्यक्षता प्रदेश के गृह मंत्री श्री ताम्रध्वज साहू ह करिन। विशिष्ट अतिथि के रूप म कृषि, अऊ पशुधन विकास, जलसंसाधन मंत्री श्री रविन्द्र चौबे, जिला के प्रभारी मंत्री श्रीमती अनिला भेड़िया, खाद्य अऊ नागरिक आपूर्ति मंत्री श्री अमरजीत भगत, विधायक बेमेतरा श्री आशीष कुमार छाबड़ा, विधायक नवागढ़ श्री गुरूदयाल सिंह बंजारे, जिला पंचायत अध्यक्ष श्रीमती कविता साहू बहुत अकन जनप्रतिनिधिगण, गणमान्य नागरिक बड़ी संख्या म उपस्थित रहिन।
आम सभा ल संबोधित करत मुख्यमंत्री श्री बघेल ह कहिन कि प्रदेश सरकार अपन वादा के मुताबिक किसान मन के धान 2500 रूपिया प्रति कुंटल के दर ले खरीदे बर प्रतिबद्ध हे। उमन केन्द्र ले अनुरोध करिन कि जइसे पहिली छत्तीसगढ़ के चावल लेत रहिन उही मुताबिक ये साल घलोक लेवय। ये बाबत् मुख्यमंत्री श्री बघेल कोति ले प्रधानमंत्री ल चिट्ठी घलोक लिखे गए हे। एखर अलावा केन्द्रीय खाद्य मंत्री ले नई दिल्ली म मुलाकात घलोक करे हें। मुख्यमंत्री ह कहिन कि हमर सरकार आए के बाद प्रदेश म खुशहाली आए हे। मनखे मन के आय म वृद्धि होए हे। प्रदेश म सुपोषण योजना अऊ हॉट बाजार क्लिनिक योजना संचालित करे जात हे। एखर सकारात्मक परिणाम आगू आवत हे। महिला अऊ बेटी मन बर घलोक बहुत अकन योजना चलाए जात हे। मुख्यमंत्री ह मनखे मन ल भरोसा देवाइन के बेमेतरा जिला के विकास बर धन के कमी आड़े नइ आवय।
गृहमंत्री श्री साहू ह कहिन कि बेमेतरा जिला के सुव्यवस्थित विकास करे जाही। बेमेतरा शहर म फोरलेन सड़क बनही, जेखर भूमिपूजन होय हे। मुख्यमंत्री ह छत्तीसगढ़ के तीज तिहार म अवकाश घोषित करके छत्तीसगढ़ी संस्कृति के संरक्षण के काम करे गए हे। श्री भूपेश बघेल के नेतृत्व म पाछू 11 महिना म अनुसूचित जाति, जनजाति, पिछड़ा वर्ग, किसान, मजदूर मन के हित म बहुत अकन कदम उठाए गए हे, जऊन सराहनीय हे। श्री साहू ह बेमेतरा विधायक कोति ले पर्यटन विभाग के तरफ ले पर्यटन स्पॉट के रूप म विकसित करे के मांग के संबंध म कहिन कि एकर परीक्षण करके जरूरी कार्यवाही कराए जाही।
कृषि मंत्री श्री रविन्द्र चौबे ह कहिन कि पाछू साल समर्थन मूल्य म 80 लाख मेट्रिक टन धान के उपार्जन करे गए रहिस। ये साल 85 लाख मेट्रिक टन खरीदे के लक्ष्य हे। किसान मन ल धान उपार्जन के संबंध म कोनो प्रकार के चिंता करे के जरूरत नइ हे। छत्तीसगढ़ के किसान मुख्यमंत्री के संग कंधा ले कंधा मिलाके खड़े हें। कृषि मंत्री श्री चौबे ह कहिन कि भारतीय खाद्य निगम छत्तीसगढ़ के चावल नइ खरीदना चाहत हे। उमन केन्द्र ले फेर से छ.ग. के चावल खरीदे के अनुरोध करिन। श्री चौबे ह मनखे मन ले भू-जल स्तर बनाए रखे बर नरवा के पानी नरवा म रोके के आव्हान करिन।
विधायक बेमेतरा श्री छाबड़ा ह कहिन कि आज मुख्यमंत्री के करकमल ले जिला के विकास बर बहुत अकन कार्य के लोकार्पण अऊ भूमिपूजन करे गए हे। अवइया समय म व्यवस्थित विकास दिखही। श्री छाबड़ा ह बताइन के बेमेतरा शहर म बॉयपास के मांग घलोक लउहे पूरा होवइया हे। विधायक ह खिलोरा जलाशय के सौंदर्यीकरण अऊ पर्यटन स्थल के रूप म विकसित करे के अनुरोध करिन। कलेक्टर ह प्रतिवेदन के पठन करत कहिन कि मुख्यमंत्री कोति ले हितग्राही मूलक योजना के अंतर्गत गर्भवती महिला मन ल सुपोषण किट, छोटे लइका मन के अन्न प्रासन्न, सिलाई मशीन, श्रमिक मन ल ई-रिक्शा, बैटरी चलित ट्रायसिकल के वितरण करे गीस। नेत्रदान महादान के कुल 08 प्रकरण के संग पूरा राज्य म धमतरी अग्रणी जिला हे। बेमेतरा जिला म स्लम पट्टा मन के नवीनीकरण अऊ नियमितीकरण करे जात हे। राजीव गांधी आश्रय योजना के अंतर्गत कुल 975 पट्टा के वितरण होना हे।
