स्वच्छता, परयावरन के रखवार अउ कमाई बढ़ाए के बनिस प्रभावी माध्यम
बालोद, छत्तीसगढ़ के गांव-गंवई मं सफ़ई अउ माईलोगन मन ला मजबूत करे के उदेस ले ग्राम पंचायत मन ला मिले ईवी गार्बेज रिक्शा अउ ईवी लोडर गाड़ी ह बड़ बदलाव लावत हे। ए गाड़ी मन के सेती जिहां गांव मं कचरा प्रबंधन मजबूत होय हे, उहें स्व-सहायता समूह के दीदी मन ला रोज-रोज के रोजगार अउ कमई के नवा मौका घलो मिलत हे। बिना तेल-पानी के चले के सेती ए गाड़ी मन परयावरन के रच्छा अउ खरचा कम करे मं घलो बड़ मददगार साबित होत हें। बालोद जिला के जनपद पंचायत डौंडीलोहारा एकर एक बढ़िया उदाहरन बनके आघू आए हे।
स्व-सहायता समूह के महिला मन घर-घर जाके कचरा सकेलत हें
बालोद जिला के जनपद पंचायत डौंडीलोहारा के मुख्य कार्यपालन अधिकारी श्री पंकज देव ह बताइन के हर ग्राम पंचायत ला लगभग 7.60 लाख रुपिया के खरचा ले एक ईवी गार्बेज रिक्शा अउ एक ईवी लोडर गाड़ी देहे गेहे। ईवी गार्बेज रिक्शा ले स्व-सहायता समूह के माईलोगन मन घर-घर जाके सूखा अउ गीला कचरा ला अलग-अलग सकेलत हें, जेकर से गांव मं सफ़ाई व्यवसथा अउ नीक अउ व्यवस्थित हो गेहे।
ईवी लोडर गाड़ी ह ग्राम पंचायत मन बर साबित होत हे बहुउपयोगी
ओमन बताइन के ईवी लोडर गाड़ी ह ग्राम पंचायत मन बर बड़ उपयोगी साबित होत हे। एकर उपयोग घर बनाए के सामान, खेती-किसानी के उपज, घर अउ किराना के सामान ढोए बर करे जात हे। कतको महिला समूह ए गाड़ी मन के उपयोग करके अतिरिक्त कमाई करत हें अउ अपन गोड़ मं खड़ा होत हें। श्री पंकज देव ह बताइन के ए जम्मो गाड़ी मन के खरीदी सरकार के नियम के मुताबिक जेम (GeM) पोर्टल ले पूरा ईमानदारी अउ कम से कम (L-1) दर मं करे गेहे, जेकर से सरकारी पइसा के सही उपयोग होए हे अउ खरीदी घलो साफ-सुथरा रहे हे।
बचत के संग परयावरन के रखवार घलो
ओमन कहिन के ईवी गाड़ी मन ला चलाए बर पेट्रोल या डीजल के जरूरत नई होवय। सिरिफ चार्ज करके चले के सेती तेल के खरचा बड़ बांचत हे, अउ कार्बन उत्सर्जन मं कमी आए के सेती परयावरन ला घलो फ़ायदा होत हे।