मुख्यमंत्री ले पद्मश्री सम्मान प्राप्त छत्तीसगढ़ के विभूति मन ह करिन मुलाकात
रायपुर, 06 मार्च 2020। मुख्यमंत्री श्री भूपेश बघेल ह कहिन हे कि पद्मश्री ले सम्मानित राज्य के विभूति मन के मान-सम्मान बढ़ाए बर राज्य सरकार कोति ले हरसंभव प्रयास करे जाही। पद्मश्री सम्मान प्राप्त विभूति मन अपन-अपन क्षेत्र के उत्कृष्ट हस्ति यें। उमन अपन कृतित्व के माध्यम ले छत्तीसगढ़ के गौरव बढ़ाए हें।
मुख्यमंत्री आज इहां विधानसभा स्थित अपन कक्ष म पद्मश्री ले सम्मानित छत्तीसगढ़ के विभूति मन के प्रतिनिधि मंडल के संग चर्चा करत रहिन। प्रतिनिधि मंडल ह मुख्यमंत्री ले कहिन कि पद्मश्री सम्मान प्राप्त मनखे ल राज्य सरकार कोति ले हर महीना सम्मान निधि के रूप म पांच हजार रूपिया के राशि देहे जात हे। ये मां बढ़ोत्तरी करे जानी चाही। प्रतिनिधि मंडल म पद्मश्री प्राप्त मनखे के परिचय पत्र राज्य सरकार कोति ले जारी करे के आग्रह करे गीस। उमन कहिन कि परिचय पत्र होए ले राज्य के बाहिर जाय म होवइया कठिनाई ले काफी हद तक राहत मिलही। अइसनहे प्रतिनिधि मंडल ह पद्मश्री प्राप्त मनखे के निधन म ओखर अंतिम संस्कार राजकीय सम्मान के संग करे के आग्रह घलोक करिन।
प्रतिनिधि मंडल म पद्मश्री सम्मान प्राप्त छत्तीसगढ़ के विभूति मन म चिकित्सा क्षेत्र के डॉ. ए.टी.के.दाबके, पुरातत्वविद डॉ. अरूण शर्मा, कवि डॉ. सुरेन्द्र दुबे, मूर्तिकार श्री जे.एम. नेल्सन, संगीतज्ञ श्री मदन चौहान, अभिनेता अउ गायक श्री अनुज शर्मा, बस्तर बैण्ड के श्री अनूप रंजन पाण्डेय, लोक गायिका श्रीमती ममता चंद्राकर, राष्ट्रीय हॉकी टीम के पूर्व कप्तान श्रीमती सबा अंजुम अऊ समाजसेविका श्रीमती शमशाद बेगम सामिल रहिन।
