आजादी के अमृत महोत्सव के तहत 13 ले 15 अगस्त तक घर मन म घलोक लहराए जाही तिरंगा
धमतरी, आजादी के अमृत महोत्सव के तहत शासन के निर्देश के मुताबिक 13 ले 15 अगस्त तक ‘हर घर तिरंगा‘ अभियान चलाए जात हे, जेखर खातिर जिला के महिला स्वसहायता समूह मन के महिला मन 26 हजार ले जादा राष्ट्रध्वज तियार करत हें। जिला प्रशासन कोति ले ए समूह मन ल केसरिया, सफेद अऊ हरियर रंग के कपड़ा देहे गए गे हे।
जिला पंचायत के मुख्य कार्यपालन अधिकारी श्रीमती प्रियंका महोबिया ह बताइस कि ‘हर घर झण्डा‘ अभियान के तहत आमजन मन म देशभक्ति के भावना जागृत करे के उद्देश्य ले आजादी के अमृत महोत्सव के अंतर्गत अवईया 13 ले 15 अगस्त तक हरेक घर, कार्यालय, प्रतिष्ठान मन म राष्ट्रध्वज फहराए जाही। उमन बताइन कि कलेक्टर श्री पी.एस. एल्मा के निर्देश के मुताबिक जिला के विभाग प्रमुख अधिकारी मन ल एखर बर नोडल अधिकारी नियुक्त करे गए हे। जिला के सबो विकासखण्ड के महिला स्वसहायता समूह मन ल झण्डा संहिता के निरधारित मापदण्ड के मुताबिक ध्वज तियार करे के काम देहे गए हे अऊ एखर सिलाई बर समूह के महिला मन सरलग ये काम म लगे हें। श्रीमती महोबिया ह बताइस कि इही कड़ी म राज्य शासन ल कुल 26 हजार 115 राष्ट्रध्वज तियार करे के जानकारी भेजे गए हे। उमन ये घलोक बताइन कि एखर बर कलेक्टर ह पुलिस अधीक्षक, सहायक परियोजना अधिकारी राष्ट्रीय ग्रामीण आजीविका मिशन, उप संचालक पंचायत, जिला शिक्षा अधिकारी, महिला अउ बाल विकास विभाग, ई-डिस्ट्रिक्ट मैनेजर, जिला खाद्य अधिकारी, जिला खेल अधिकारी, उप संचालक कृषि, वन मण्डलाधिकारी, महाप्रबंधक व्यापार अउर उद्योग केन्द्र, मुख्य चिकित्सा अउर स्वास्थ्य अधिकारी, आयुक्त नगर निगम, जिला प्रबंधक अग्रणी बैंक, उप पंजीयक सहकारी समिति, सहायक आयुक्त आदिवासी विकास, प्राचार्य बाबू छोटेलाल श्रीवास्तव पीजी महाविद्यालय, प्राचार्य भोपालराव पवार पॉलीटक्निक महाविद्यालय अऊ उप संचालक समाज कल्याण अउर रेडक्रॉस सोसायटी ल विभाग ले संबंधित अउ अधीनस्थ स्थान मन म राष्ट्रध्वज फहराए बर नोडल अधिकारी नियुक्त करे गए हे। संगेच ये घलोक निर्देशित करे गए हे कि नोडल अधिकारी अपन संबंधित संस्थान, कार्यालय मन म भारतीय ध्वज संहिता के पालन करत 13 ले 15 अगस्त तक राष्ट्रध्वज फहरावयं, जेखर से आमजन म देशभक्ति के भावना के विकास होवय अऊ जनमानस म राष्ट्रीय ध्वज के प्रति सम्मान म बढ़ोतरी होवय।
इही कड़ी म जिला पंचायत के मुख्य कार्यपालन अधिकारी ह स्थानीय लाइवलीहुड कॉलेज के दौरा करिन, जिहां म सिलाई के प्रशिक्षु 22 महिला मन राष्ट्रध्वज तियार करत हें। ये दौरान उमन ये ठउका करे ल कहिन कि ध्वज के आकार निरधारित मापदण्ड के मुताबिक ही होवय। श्रीमती महोबिया ह महिला मन के उत्साहवर्धन करत भरोसा जताईन के निरधारित समयावधि म ऊंखर कोति ले ध्वज तियार कर लेहे जाही। ये बेरा म संस्था के परियोजना अधिकारी अउ ट्रेनर उपस्थित रहिन।
