गांव के गौठान के एक एकड़ जमीन ग्रामोद्योग गतिविधि मन बर रइही आरक्षित
मुख्यमंत्री सामिल होइन ’रिस्टार्ट छत्तीसगढ़ ऑफ्टर लॉकडाउन’ ई-कॉन्क्लेव म
रायपुर, 11 जुलाई 2020। मुख्यमंत्री श्री भूपेश बघेल ह कहे हें के अवइया समय म छत्तीसगढ़ के हर गांव म एक इंडस्ट्रियल पार्क होही। उमन कहिन के गांव म गौठान बर आरक्षित करे गए जमीन म ले एक एकड़ जमीन कुटीर अऊ लघु उद्योग मन बर आरक्षित रइही, जिहां स्व-सहायता महिला समूह कोति ले लघु वनोपज उपर वेल्यूएडीशन के काम करे जाही। मुख्यमंत्री ह आज एक इलेक्ट्रॉनिक समाचार चैनल हिन्दी खबर कोति ले आयोजित ई-कॉन्क्लेव के समापन अवसर म ये बात कहिन। श्री भूपेश बघेल ’रिस्टार्ट छत्तीसगढ़ ऑफ्टर लॉकडाउन’ विसय म आयोजित ये कॉन्क्लेव म रायपुर स्थित अपन निवास कार्यालय ले वीडियो कांफ्रेंसिंग के संग सामिल होइन। श्री बघेल ह कहिन के गोधन न्याय योजना प्रदेश म 20 जुलाई के हरेली तिहार ले शुरू करे जात हे। ये योजना म पशु-पालक मन ले गोबर खरीदके गौठानों म वर्मी कम्पोस्ट तियार करे जाही। छत्तीसगढ़ देश के पहला राज्य हे, जिहां गोबर के खरीदी करे जाही। उमन गांधी जी के 150वां वर्षगांठ के अवसर म शुरू करे गए सुराजी गांव योजना के विस्तार ले जानकारी देवत कहिन के ये योजना छत्तीसगढ़ के ग्रामीण अर्थव्यवस्था के एक मजबूत आधार स्तंभ साबित होही। ये योजना के माध्यम ले राष्ट्रपिता महात्मा गांधी के ग्राम स्वराज के कल्पना साकार होही।
