मुख्यमंत्री ह बीजापुर के युवा ग्रेजुएट पंच के बढ़ाइन हौसला
बीजापुर जिला के युवा मन ले मुख्यमंत्री ह करिन आत्मीय मुलाकात
बीजापुर/ मुख्यमंत्री श्री विष्णुदेव साय ह आज इहां छत्तीसगढ़ विधानसभा परिसर म स्वामी विवेकानंद युवा प्रोत्साहन योजना के तहत राजधानी रायपुर के भ्रमण म आए बीजापुर जिला के युवा मन ले मुलाकात करिन। मुख्यमंत्री श्री साय ए युवा मन ले बहुत आत्मीयता ले मिलिन अऊ उंखर से राजधानी रायपुर भ्रमण के अनुभव मन ल जानिन। मुख्यमंत्री ह कहिन के बस्तर के हर गांव आप के अच्छा गांव बनही। बस्तर के विकास ल अब कोनो नइ रोक सकय। बस्तर के युवा आज आत्मविश्वास ले भरे हे।
मुख्यमंत्री श्री साय ह बीजापुर जिला के कई ठन ग्राम पंचायत ले आये युवा मन ले उंखर हाल-चाल जानिन अऊ आत्मीय चर्चा करिन। मुख्यमंत्री ह युवा मन ले पूछिन के ओ मन पाछू डेढ़ बछर म का बदलाव महसूस करत हें? युवा मन ह बताइन के बहुत बदलाव हे। अब हमार क्षेत्र म सड़क बनत हे, बिजली के व्यवस्था हो गए हे अऊ आंगनबाड़ी केंद्र घलोक खुलत हे। मुख्यमंत्री ह कहिन के बस्तर के विकास हमर सरकार के प्राथमिकता हे।
मुख्यमंत्री श्री साय ह युवा मन ले उंखर पढ़ाई-लिखाई अऊ गतिविधि मन के विसय म जानकारी लीन। बीजापुर के एक युवा ह मुख्यमंत्री श्री साय ल बताइस के वो जूलॉजी विसय ले बीएससी करे हे अऊ अभी हाल म वो अपन गांव के पंच हे। ओखर एक साथी घलोक पंच निर्वाचित होय हे। मुख्यमंत्री ह ए युवा मन के जज्बा के सराहना करिन अऊ उंखर हौसला बढ़ाइन।
ए बेरा म उपमुख्यमंत्री श्री विजय शर्मा ह लइका मन ले पूछिन- कतका लइका इंस्टाग्राम चलाथें? जब ए सवाल म कई लइका मन ह हाथ उठाइन त मुख्यमंत्री ह आश्चर्यमिश्रित मुस्कान के संग कहिन के अब बस्तर के हमार लइका मन घलोक समय के संग हाईटेक होवत हें। ये सुनके ठहाका गूंज उठिस। मुख्यमंत्री ह ए बात म खुशी जाहिर करिन के युवा अपडेट हें अऊ तकनीक ल समझत हें। युवा मन ह बताइन के ऊंखर गांव म अब मोबाइल टावर घलोक लगत हे।
युवा मन ह मुख्यमंत्री ल बताइन के ओ मन काल राजधानी रायपुर आइन। उमन मुक्तांगन, जंगल सफारी संग आन जगा देखिन। मुख्यमंत्री श्री साय ह युवा मन ले कहिन के ओ मन राजधानी रायपुर के भ्रमण के अनुभव के पूरा लाभ उठावयं।
जानबा हे के स्वामी विवेकानंद युवा प्रोत्साहन योजना के तहत बीजापुर जिला के नियद नेल्लानार ग्राम पंचायत मन के 100 युवा राजधानी रायपुर के भ्रमण म आये हें। जेखर अंतर्गत आज ये युवा छत्तीसगढ़ विधानसभा पहुंचिन। ए बेरा म वनमंत्री श्री केदार कश्यप, विधायक श्री किरण देव, श्री संपत अग्रवाल, श्री ईश्वर साहू संग गणमान्यजन उपस्थित रहिन।
बस्तर के हर गांव बनही आप के बने गांव- मुख्यमंत्री श्री विष्णुदेव साय
