रायपुर। उत्कृष्ट खिलाड़ी के लिए आवेदन करैया खिलाड़ि के लिए राहत भरे खबर हावय. संचालनालय खेल एवं युवा कल्याण ह आदेश जारी करके आवेदन जमा करे के अंतिम तिथि 30 अप्रैल तक बढ़ा दे हे. एखर पहले 27 मार्च तक आवेदन जमा करना रहिस.
संचालनालय खेल एवं युवा कल्याण के ओर से जारी आदेश म कहे गे हे कि नोवेल कोरोना वायरस के संक्रमण के रोकथाम अउ नियंत्रण के लिए शासन ह धारा 144 लगाय हे. एखर मद्देनजर आवेदन जमा करे के अंतिम तिथि धारा 144 हटे के बाद से आगामी पंद्रह दिवस के लिए याने 30 अप्रैल तक बढ़ाय जात हे.
एखर अलावा कहे गे हे कि आवेदक जिस जिला के निवासी हे, ओ जिला म खेल एवं युवा कल्याण विभाग के जिला कार्यालय म या संचालनालय खेल एवं युवा कल्याण रायपुर म निर्धारित प्रपत्र म अपन आवेदन जमा कर सकत हें. एखर लिए विभाग के वेबसाइट से आवेदन पत्र डाउनलोड करे जा सकत हे.
मुंगेली ले गुरतुर गोठ बर दिलीप बसंत
