काली 27 जुलाई इतवार के होही आबकारी आरक्षक भर्ती परीक्षा

-जिला म कुल 25496 अभ्यर्थी होहीं सामिल, 70 केंद्र मन म होही परीक्षा के आयोजन
-आबकारी आरक्षक भर्ती परीक्षा 2025 बर व्यापम कोति ले जारी होइस जरूरी दिशा निर्देश
-कलेक्टर श्री अभिजीत सिंह ह गाइडलाइंस के अक्षरशः पालन बर दीन हुकुम
-परीक्षा बिहिनिया 11.00 बजे ले, बिहनिया 10.30 बजे मुख्य द्वार हो जाही बंद
दुर्ग, कलेक्टर श्री अभिजीत सिंह ह आबकारी आरक्षक भर्ती परीक्षा 2025 के सफल संचालन बर जिला नोडल अधिकारी अऊ केन्द्राध्यक्ष मन ल व्यापम कोति ले जारी दिशा निर्देश मन के कड़ाई ले पालन करे के हुकुम देहे हे। मिले जानकारी के मुताबिक व्यापम कोति ले 27 जुलाई 2025 के आबकारी आरक्षक भर्ती परीक्षा 2025 के आयोजन होवइया हे। जेमां सामिल होवइया जिला के कुल 25496 अभ्यर्थी मन बर कुल 70 परीक्षा केंद्र मन म परीक्षा के आयोजन करे गए हे। परीक्षा 11.00 बजे ले 1.15 बजे तक आयोजित करे जाही, फेर अभ्यर्थी मन बर परीक्षा केन्द्र के मुख्य दुवार 10.30 बजे बंद कर दे जाही।
परीक्षा केन्द्र मन म भारत इलेक्ट्रॉनिक लिमिटेड (बीईएल) कोति ले जैमर अऊ हर एक परीक्षा केन्द्र म एक कर्मचारी के ड्यूटी लगाए जात हे। पुलिस कर्मी मन के ड्यूटी लगाय, ऊंखर प्रशिक्षण अऊ परीक्षा तारीक ल निरधारित समय म उपस्थिति के बर उप पुलिस अधीक्षक या ओखर से उंचहा स्तर के पुलिस अधिकारी ल जिला पुलिस नोडल अधिकारी नियुक्त करे संबंधी निर्देश के पालन ठउका करे ल कहे गए हे।
परीक्षा केन्द्र म अभ्यर्थी मन के हैण्डहेल्ड मेटल डिटेक्टर ले अऊ मैनुअल पैट डाउन (हाथ ले तलाशी) फ्रिस्किंग करे जाही। हरेक परीक्षा केन्द्र म आबंटित एक पुरुष अऊ एक महिला पुलिस कर्मी ये फ्रिस्किंग के काम करहीं। ए पुलिस कर्मी मन ल परीक्षा चालू होए ले 2.30 घंटा पहिली अनिवार्य रूप ले परीक्षा केन्द्र म अपन उपस्थिति ठउका करे ल कहे गए हे। महिला अभ्यर्थी मन के क्रिस्किंग महिला पुलिस कर्मी ह करही। परीक्षा केन्द्र के हर एक कक्ष म दीवाल घड़ी लगाए जाही।
परीक्षा म सामिल होवइया अभ्यर्थी मन के हित म व्यापम कोति ले जरूरी निर्देश जारी करे गए हे। जेखर मुताबिक परीक्षार्थी परीक्षा चालू होए के कम से कम 2 घंटा पहिली परीक्षा केन्द्र म पहुंचंय ताकि ओखर फ्रिस्किंग अऊ सत्यापन करे जा सकय। परीक्षा चालू होए के 30 मिनट पहिली परीक्षा केन्द्र के मुख्य द्वार बंद कर देहे जाही। काबर कि ये परीक्षा बिहनिया 11.00 बजे ले चालू होही जेखर सेती मुख्य द्वार बिहनिया 10.30 बजे बंद कर देहे जाही। हल्का रंग के आधी बाह वाला कुरथा अऊ फुटवियर के रूप म चप्पल पहिर के परीक्षा देना होही। कान म कोनो प्रकार के आभूषण वर्जित हे। परीक्षा कक्ष म कोनो प्रकार के संचार उपकरण, इलेक्ट्रॉनिक उपकरण, इलेक्ट्रॉनिक घडी, पर्स, पाऊच, स्कार्फ, बेल्ट, टोपी आदि ले जाना पूरा मना हे। धार्मिक अऊ सांस्कृतिक पोशाक वाले अभ्यर्थी मन ल परीक्षा केन्द्र म सामान्य समय ले पहिली रिपोट करना होही, ओ मन ल अकतहा सुरक्षा जांच ले गुजरे बाद ही अइसन पोशाक के अनुमति होही। परीक्षा म अनुचित साधन के परयोग करे म कठोर कार्यवाही करे जाही अऊ अभ्यर्थिता खतम कर दे जाही।