रायपुर, 31 जुलाई 2024। महासमुंद जिला म मदिरा के अवैध परिवहन अउ विक्रय उपर रोक लगाय के उद्देश्य ले संचालित सघन जांच-पड़ताल के अभियान के समय आबकारी विभाग के टीम ह सरायपाली इलाके म दू अलग-अलग मामला मन म 235 लीटर कच्ची महुआ शराब अऊ परिवहन म प्रयुक्त दू स्कूटी ल जब्त करे हे। जब्त दुनों स्कूटी के कीमत लगभग एक लाख 67 हजार रूपिया हे।
सरायपाली वृत्त के आबकारी टीम ह ग्राम बेलमुंडी म गश्त दौरान बेलमुंडी गौठान तीर रोड म स्कूटी सवार गूंज राम खूंटे अउ शिबो बरिहा ल रोकके तलाशी लीस। स्कूटी म रखे बोरी म अउ डिक्की ले 150 लीटर हाथ भट्टी कच्ची महुआ शराब बरामद होइस। जेन ल जब्त करके आरोपी मन के विरुद्ध धारा 34(2), 46(2)(1) के तहत प्रकरण पंजीबद्ध कर आरोपी शिबो राम बरिहा ल गिरफ्तार करके न्यायिक अभिरक्षा म भेजे गीस। तलाशी के समय गूंज राम खूंटे मौका देखके फरार हो गीस। वोखर तलाश करे जात हे।
आबकारी विभाग के टीम ह स्कूटी एक्टिवा नंबर सीजी 06 एक्स 2384 म सवार करण जोल्हे अउ धर्मेंद्र खूंटे ल रोकके तलाशी शुरू करिस। उही बेरा म दुनों गाड़ी ल छोड़के फरार हो गे। स्कूटी म रखे जूट बोरी अउ डिक्की के जांच करे म कुल 85 लीटर हाथ भट्टी कच्ची महुआ शराब मिलीस, जेन ल स्कूटी संग जब्त करे गीस। फरार आरोपी मन के विरुद्ध धारा 34(2), 46(2)(1) के तहत प्रकरण पंजीबद्ध कर विवेचना म लेहे गए हे। फरार आरोपी मन के पतासाजी करे जात हे। ए कार्रवाई म आबकारी उप निरीक्षक सरायपाली दरसराम सोनी, आरक्षक राज किशोर पाण्डेय, खिनीराम खुटे अउ कमल पटेल आदि सामिल रहिन।