रायपुर, 18 सितमबर 2024। मुख्यमंत्री श्री विष्णु देव साय ह राजधानी रायपुर के इंडोर स्टेडियम म प्रधानमंत्री श्री नरेन्द्र मोदी के विकसित भारत के संकल्पना उपर आधारित छाया फोटू प्रदर्शनी के शुभारंभ करिन। ये प्रदर्शनी छत्तीसगढ़ शासन के जनसंपर्क विभाग कोति ले लगाए गए हे। प्रदर्शनी म प्रधानमंत्री श्री नरेन्द्र मोदी के जनकल्याण अउ भारत ल विकसित देश के श्रेणी म लाय बर बीते दस साल म शुरू करे गए अभिनव अउ क्रांतिकारी योजना, कार्यक्रम अउ नीति मन के संगे-संग प्रधानमंत्री जी के जीवन के पहलु मन ल छाया-चित्र के माध्यम ले प्रदर्शित करे गए हे।
जानबा हे कि प्रधानमंत्री श्री नरेन्द्र मोदी आज जन्म दिन ये। मुख्यमंत्री श्री विष्णु देव साय के मार्गदर्शन म प्रधानमंत्री जी के जन्मदिन के उपलक्ष्य म प्रधानमंत्री आवास योजना के तहत राज्य के 5 लाख ले जादा परिवार ल पक्का मकान बनाए बर पहिली किस्त के राशि के अंतरण घलोक हितग्राही मन ल डी.बी.टी. के माध्यम ले खाता म करे गए हे। प्रधानमंत्री आवास योजना केन्द्र सरकार अऊ राज्य सरकार के महत्वकांक्षी योजना हे। एखर तहत् राज्य म 18 लाख ले जादा परिवार ल छत्तीसगढ़ सरकार कोति ले अवास के स्वीकृति देहे गए हे।
ए मौका म विधानसभा अध्यक्ष डॉ रमन सिंह,गृह मंत्री श्री विजय शर्मा, खाद्य मंत्री श्री दयाल दास बघेल, महिला बाल विकास मंत्री श्रीमती लक्ष्मी राजवाड़े, सांसद श्री बृजमोहन अग्रवाल संग बहुत अकन जनप्रतिनिधि अऊ बड़ संख्या म प्रधानमंत्री आवास योजना के हितग्राही उपस्थित रहिन।